कर्मचारीमाथि गाेली हानेर अज्ञात समूहले चार लाख लुट्यो
सुनसरीको धरान उपमहानगरपालिका–५ साउनेटारमा रहेको जीवन विकास वित्तीय संस्थाका कर्मचारीमाथि गोली प्रहार गरी नगद लुटिएको छ ।
गोली प्रहारबाट कर्मचारी मोरङ, धनपालथानका शम्भु गच्छदार घाइते छन् । उनको बायाँ हातको कुइनामुनि र बायाँ कम्मरमा गोली लागेको प्रहरीले जनाएको छ । घाइते गच्छदारको वीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।
गच्छदारसँग भएको चार लाख रुपैयाँ लुटिएको बताइएको छ । गोली प्रहार गर्ने समूहको खोजी गरिरहेको प्रहरीले बताएको छ । घटनास्थल धरान बजारबाट पूर्व सेउती खोलापारि देउराली नजिकै पर्छ ।
बैंककै कामको सिलसिलामा धरान बजारबाट केही पर गाउँमा पुगेका बेला गच्छदारमाथि गोली प्रहार भएको प्रहरीले जनाएको छ । प्रहरीको प्रारम्भिक अनुसन्धानमा गच्छदारसँग रहेको झोला लुट्नकै लागि गोली प्रहार भएको खुलेको छ । तर, घटनाको यथार्थ विवरण भने आउन बाँकी छ ।
