एयरपोर्टका पसल बन्द, पर्यटक प्याकप्याक
नेपालको रमणीयता हेर्न आएका पर्यटक जब त्रिभुवन अन्तर्राष्ट्रिय विमानस्थल हुँदै स्वदेश फर्किन थाल्छन्, तब एक घुट्को पानी पिउन नपाएर प्याक–प्याक हुँदै फर्किनुपर्ने बाध्यता शुरु भएको छ । एयरपोर्टको अन्तिम प्रस्थान कक्ष (स्टेरलाइज एरिया) बाट अत्यावश्यक सामग्री विक्रि हुने पसल बन्द गरिँदा पर्यटकहरु यस्तो मारमा परेका हुन् ।
प्रश्न उठेको छ कि, एउटा विदेशी काठमाडौं उत्रिएदेखि एयरपोर्टबाटै यहाँको भद्रगोल, अव्यवस्था र बेथिती भोग्दै जान्छ । र, फर्किनेबेला त्यति नै सास्ती खेप्नु परेपछि उसले फेरि नेपाल आउँछु भन्छ कि भन्दैन होला ?
यही स्थितिका कारण विदेशीहरु ‘फेरि–फेरि नेपाल आउँछु’, हैन कि, ‘यस्तो ठाउँमा फर्किएर आउनु नपरोस्’ भन्न थालेका छन् । विमानस्थल विस्तारका नाममा स्टेरलाइजसहितका विभिन्न क्षेत्र भत्काइँदैछ । धावनमार्ग पुनःनिर्माणका नाममा विदेशबाट आउने जहाजलाई लामो समय आकाशमै वा भारतीय विमानस्थलहरुमा होल्ड गराइएको छ भने यताबाट उड्नुपर्ने जहाजको तालिका गड्बड हुन थालेको छ । यस्तो अवस्थामा स्टेरलाइज एरियामा बसेर उडान समय पर्खिने यात्रुलाई पानी, चिया, कफी, चुइङ्गम, बिस्कुटजस्ता सानातिना चिज चाहिएको हुन्छ । तर, आजकल त्यहाँ ती पसल बन्द गरिएका छन् ।
स्टेरलाइजभित्र छिरेको यात्रुले फर्किएर सामान किन्छु भन्यो भने सुरक्षाका कारण आवत–जावत गर्न दिइँदैन । त्यसमाथि छिर्ने र निस्कने अलग–अलग व्यवस्थाका कारण त्यो कुरा सम्भव पनि छैन । यस्तो भद्रगोल भएपछि विमानस्थलका जिम्मेवार अधिकारीहरु आफ्नो परिचय खुल्ने पास लुकाएर स्टेरलाइज छिर्नुपर्ने बाध्यता छ ।
केही दिनअघि एकजना हाकिम पाससहित स्टेरलाइज एरिया पुग्दा यात्रुको घेराउमा परेका थिए । कारण हो, पानीजस्तो अति आवश्यक चिज पनि उपलब्ध नगराइनु र त्यही कारण एकजना रक्तचापको समस्या भएका विदेशी यात्रु अर्धचेत अवस्थामा पुग्नु । यात्रुहरु भन्दै थिए भनी आजको जनआस्थामा समाचार प्रकाशित भएको छ कि, ‘यिनले दुई घुड्को पानी पिउन पाए श्वास फेरेर नेपाल छाड्थे । तर, यो स्थितिले बाँचेर फर्किने कि मरेर, टुंगो भएन ।’
