नेकपाको पोलिटब्यूरो, केन्द्रीय सदस्यको जिम्मेवारी र जनवर्गीय संगठनको एकता एकै दिन घोषणा गर्ने
नेकपाले पोलिटब्यूरो गठन, केन्द्रीय सदस्यहरुको जिम्मेवारी र जनवर्गीय संगठनहरुको एकता एकै दिन घोषणा गर्ने भएको छ । पार्टी एकताको दिन जेष्ठ ३ मा घोषणा गर्नेगरी तयारी गरिएको छ ।
पोलिटब्यूरो गठनका लागि शीर्ष नेतामा सहमति जुटिसकेको छ भने जनबर्गीय संगठनको टुंगो पनि लागिसकेको छ । केन्द्रीय सदस्यहरुको जिम्मेवारी बाँडफाँडमा भने सकस परेको छ । जिल्ला इन्चार्ज टुंग्याउने बिषयमा नेताहरुबीच छलफल चलिरहेको स्रोतले बताएको छ ।
जिल्ला इन्चार्ज टुंग्याउने अध्यक्षद्धय केपी शर्मा ओली, पुष्पकमल दाहाल प्रचण्ड र बरिष्ठ नेता माधव नेपालबीच एक्लाएक्लै छलफल भइरहेको छ । सोमबार अध्यक्ष ओली र वरिष्ठ नेता नेपालबीच चार घण्टा बालुवाटारमा छलफल भएको थियो ।
पूर्व एमालेबाट पोलिटब्यूरो बन्ने सदस्यहरुको नाम टुंगो लागेको छ । पूर्व पोलिटब्यूरो सदस्यहरु स्वतः परेका छन् भने बाँकी २० जनाका हकमा मापदण्ड बनाइएको छ । महाधिबेशनमा प्रतिनिधि बनेको, दुई वा त्यो भन्दा बढि केन्द्रीय समितिमा बसिसकेका नेताहरु पोलिटब्यूरोमा पर्नेछन् ।
यही मापदण्डका आधारमा पोलिटब्यूरोको सूचि तयार भएको छ । जिल्ला नेतृत्व पनि सिनियरका आधारमा बनाउने ओली र नेपालबीच सहमति भइसकेको छ । जनप्रतिनिधिहरु पनि जिल्ला नेतृत्वमा आउने भएका छन् ।
जनवर्गीय संगठनको बाँडफाँड गर्न तीन नेताबीच छलफल भइरहेको छ । पूर्वएमाले र पूर्वमाओवादीबीच कुन जनवर्गीय संगठन कसले लिने भन्ने बिषयमा छलफल भइरहेको छ ।
