अपराध महाशाखाको हिरासतमा रहेका तामाङलाई चरम यातना
नुवाकोटका नवराज तामाङ ट्याक्सी चालक हुन् । काठमाडौं रानीबारीका लालेन्द्र शेरचन्दको घरमा डकैत गरेको आरोपमा उनीसहित केहीलाई प्रहरीले पक्राउ गरेको थियो । चैत २६ मा डकैत घटना भएको हो । उनीहरुलाई त्यही आरोपमा तुरुन्तै पक्राउ गरिएको प्रहरीले जनाएको छ । प्रहरीले पक्राउ गरेपछि तामाङलाई निर्ममतापूर्वक कुटपिट गरिएको तस्वीर प्राप्त भएको छ ।
हत्गडी लगाएको अवस्थामा शरीरभर निलडाम हुने गरी पिटिएका तामाङलाई जर्वजस्ती घटनामा संलग्नताको स्वीकार गर्न लगाईएको उनीहरुका आफन्तले बताएका छन् ।
डिएसपी रुगम कुँवर र सई दिपेन्द्र चन्दले तामाङलाई अमानवीय ढंगले लाठीले हानेको पीडित पक्षको भनाई छ । बिगतमा भक्तपुरमा बालक अपहरण गरेको आरोप लागेका कामदारलाई ईन्काउन्टरको नाममा गोली हानेको आरोप पनि डिएसी कुँवरलाई लागेको छ । केही पहिले हेटौंडामा मादक पदार्थ सेवनमा भएको झडपमा कपडा छोडेर भागेका बेला परिचयपत्रसमेत सई चन्दको भेटिएको थियो ।
तर, यस बिषयमा कुनै कार्वाही भएन । यस बिषयमा प्रहरीले भने आवश्यक अनुसन्धानपछि मात्र प्रतिकृया दिने बतायो । यसरी यातना दिने प्रहरीलाई यातना तथा क्षतिपूर्ति ऐन अन्तर्गत कार्वाही हुने कानुनी प्रावधान छ । यस बिषयमा मानव अधिकार आयोगले पनि अनुसन्धान गर्ने भएको छ ।
