खुलामञ्चमा बनाइएका सटरमा डोजर चल्यो

 

खुलामञ्च अतिक्रमणका विषयमा काठमाडौँ महानगरपालिकाका मेयर विद्यासुन्दर शाक्य एक्सनमा उत्रिएका छन् । सम्झौताविपरित खुलामञ्चमा भौतिक संरचानहरु बनाएपछि मेयर शाक्य एक्सनमा उत्रिएका हुन् । मेयर शाक्यको निर्देशनमा महानगरपालिकाले खुलामञ्चमा बनाइएका सटर भत्काउन सुरु गरेको छ ।

खुला मञ्चमा सटर बनाएपछि महानगरपालिकाले शनिबार डोजर लगाएर भत्काउन सुरु गरेको हो । काठमाडौं महानरपालिकाका कार्यान्वयन महाशाखा प्रमुख धनपति सापकोटा नेतृत्वको नगरप्रहरीसहितको टोलीले सटर भत्काउन सुरु गरेको महानगरले जनाएको छ । खुला मञ्चमा ५१ वटा सटर निर्माण गरिएको थियो ।

खुलामञ्च अतिक्रमणका विषयमा मेयर शाक्यले उपमेयर हरिप्रभा खड्गीलाई अनुगमन गरि प्रतिवेदन पेश गर्न निर्देशन दिएका थिए ।

शुक्रबार मात्रै शाक्यले उपमेयर खड्गीले प्रतिवेदन बुझाउन ढिला गरे तत्काल डोजर लगाएर सटर भत्काउने बताएका थिए ।