भिजिट भिषामा विदेश काम गर्न पठाउने खोज्ने थापा प्रहरीको फन्दामा
महानगरीय प्रहरी अपराध महाशाखाले भिजिट भिषामा बैदेशिक रोजगारका लागि विदेशमा मान्छे पठाई ठगी गरेको आरोपमा एक महिलालाई पक्राउ गरेको छ ।
पक्राउ पर्नेमा भोजपुर जिल्ला हतुवागढी गाउँपालिका वडा नम्बर-९ घर भई हाल काठमाडौं महानगरपालिका वडा नम्बर-२६, सामाखुसी बसोबास गर्ने विमला थापा रहेकी छन् ।
उनले कम्पास रिक्रुटमेन्ट मेनपावर कम्पनीमार्फत उक्त ठगी धन्दा चलाउँदै आएको प्रहरीको भनाई छ ।
थापा उक्त कम्पनीकी म्यानेजर हुन् । उनले प्रतिब्यक्ति दुई लाख ४० हजार रुपैयाँ लिएर दुई जनालाई दुबई पठाउन खोज्दा अध्यागमन कार्यालयले फिर्ता पठाएपछि उनको ठगी धन्दा बाहिरिएको थियो ।
गौशालाबाट पक्राउ परेकी थापाले भिजिट भिषामा विदेश पठाएर ठगी गरेको भन्दै धनुषा जिल्ला विहारी नगरपालिका वडा नम्बर-२ बसोबास गर्ने मोहम्मद गुलाम राईन र सविर राईनले जाहेरी दिएका थिए ।
त्यसपछि उनलाई पक्राउ गर्न अपराध महाशाखाको टोली खटिएको थियो ।
प्रहरीले उक्त कम्पनीका सञ्चालक गिरिराज घिमिरेलाई पनि खोजी गरिरहेको जनाएको छ । त्यसरी नै ठगिएका कोही भए प्रहरीमा सम्पर्क राख्न अपराध महाशाखाले भनेको छ ।
