पेट्रोलियम पाइपलाइनमा देखियो ओली सरकारको काम, बैशाखबाट सञ्चालन
बहुप्रतीक्षित नेपाल भारत (मोतिहारी–अमलेखगन्ज) पेट्रोलियम पाइपलाइन बैशाखबाट सञ्चालनमा आउने भएको छ ।
प्रधानमन्त्री केपी शर्मा ओली नेतृत्वको सरकारले पाइपलाइन निर्माणको कामलाई उच्च प्राथमिकतामा राखेर अघि बढाएपछि बैशाख अन्तिमबाट पाइपलाइन सञ्चालनमा आउने भएको हो ।
मोतिहारी अमलेखगञ्ज पेट्रोलियम पाइपलाइन सञ्चालनमा आएसँगै इन्धन ढुवानीमा खर्च हुने वार्षिक २ अर्ब रुपैयाँ भन्दा बढी भाडा बचत हुने भएको छ ।
नेपाल आयल निगमका अमलेखगञ्ज डिपोका प्रमुख प्रदीप यादवका अनुसार सुरुवाती चरणमा डिजेलमात्र पाइपलाइनबाट ल्याइनेछ ।
पाइपलाइन सञ्चालनमा आएसँगै ढुवानी लागतको न्यूनीकरणले उपभोक्ता मूल्यसमेत समायोजन हुने उहाँको भनाई छ ।
देशभित्र खपत हुने डिजेलमध्ये ७० प्रतिशत अमलेखगञ्जबाट आपूर्ति हुने गरेको तथ्यांक रहेको छ ।
निर्माणाधीन यस परियोजनाको नेपालतर्फ कुल ३६.२ किमीमध्ये ९ किलोमिटर जति पर्सा राष्ट्रिय निकुञ्ज र यससँगैको जंगल क्षेत्र पर्छ ।
बाँकी भागमा पाइपलाइन निर्माणको काम सम्पन्न भएपनि जंगल क्षेत्रमा काम केही ढिलाइ भएको थियो ।
गत माघ ३ गते मन्त्रिपरिषद बैठकले निर्णय गरेपछि अहिले निकुञ्ज क्षेत्रमा धमाधम काम भइरहेको छ ।
जंगल क्षेत्रमा डेढ किमी पाइप लाइन गाड्ने काम सकिएको आयोजनाले जनाएको छ ।
क्षेत्रमा पाइपलाइन निर्माण गरिसक्दा ६ हजार ५६३ रुख काट्नुपर्ने देखिएको छ ।
रुख कटान र पाइप लाइन बिछ्याउने काम एकसाथ अघि बढिरहेको छ ।
पाइपलाइनबाट डिजेल आपूर्ति हुनेभएपछि अमलेखगन्ज डिपोले ३ हजार ९ सय किलोलिटरका दुई र ४१ हजार किलोलिटरका दुई इन्धन ट्यांकलाई पाइपलाइनबाट आपूर्ति हुँदा प्रेसर (दबाब) थेग्न सक्ने गरी स्तरोन्नती गरिरहेको छ ।
अमलेखगञ्जका क्षेत्रीय प्रमुख यादवका अनुसार दैनिक ४ हजार किलोलिटर डिजेल पाइपलाइनबाट आपूर्ति हुनेछ ।
मोतिहारी अमलेखगञ्ज पेट्रोलियम पाइपलाइन निर्माणका लागि दुई अर्ब ७५ करोड भारतीय रुपैयाँ लागत अनुमान गरिएको भएपनि परियोजनाको कुल लागत ३ अर्ब २४ करोड भारतीय रुपैयाँ लाग्ने भएको छ ।वस्ती तथा खोला भएका स्थानमा होराइजेन्टल डाइरेक्सनल ड्रीलिङ गर्नुपरेकाले परियोजनाको लागत बढेको हो ।
जीतपुर बजार, परवानीपुर बजार, भन्सार क्षेत्र तथा सिर्सिया नदी र अन्य खोला र नहर क्षेत्रमा गरी ७ किलोमिटर क्षेत्रमा जमिनको धेरै मुनिबाट पाइप बिछ्याइएको छ ।
मोतिहारी–अमलेखगञ्ज पाइपलाइन निर्माणसँगै उक्त पाइपलाइनलाई चितवनको लोथरसम्म विस्तार गर्ने निगमको योजना रहेको छ ।
निगमका महाप्रबन्धक सुरेन्द्रकुमार पौडेलका अनुसार ढुवानी लागत कटौती गर्नुका साथै चुहावटमा उल्लेख्य कमी आउने भएको कारण लोथरसम्म बिस्तारको योजना रहेको छ ।
