झापाका सबै कार्यक्रम छोडेर प्रधानमन्त्री बारा जादै, घाइतेको उपचार र उद्धारमा खट्न निर्देशन

 

प्रधानमन्त्री केपी शर्मा ओली आँधी प्रभावित जिल्ला बारा जानुहुने भएको छ । पूर्वनिर्धारित कार्यक्रम अन्तर्गत हिजो झापा पुग्नु भएका प्रधानमन्त्री ओली सबै कार्यक्रम स्थगित गरेर बारा जान लाग्नु भएको हो ।

 

प्रधानमन्त्रीका जनसम्पर्क सल्लाहकार अच्युत मैनालीका अनुसार उहा हेलिकोप्टरबाट सिधै आधी प्रभावित जिल्ला बारा जाने कार्यक्रम तय भएको बताउनु भयो । आँधी हुरीले बारा, पर्सालगायतका जिल्लामा जनधनको धेरै क्षति भएको जानकारी पाएपछि ओलीले पूर्वनिर्धारित सबै कार्यक्रमहरु स्थगित गर्नुभएको मैनालीले जानकारी दिनुभयो ।

 

यसैविच प्रधानमन्त्री ओलीले घाइतेको उपचारमा सरकारले कुनै कसर बाँकी नराख्ने बताउनु भएको छ । आज एक अर्को टिवट् गर्दै उहाले अहिलेसम्म २७ जनाको मृत्यु भएको जानकारी दिनुभयो । यस्तै घाइते भएका ६१२ जना मध्ये ३४३ जना उपचारपछि घर फकिएको समेत बताउनु भयो । तत्काल राहतका लागि सामग्रीसहित नेपाल प्रहरीको टोली विहान पौने पाँच बजे प्रभावित क्षेत्रमा पुगेको पनि जानकारी गराउनु भएको छ ।