फाइटर विमान चालिकामाथि बलात्कार भएको खुलासा
अमेरिकी एक महिला सिनेटरले आफूलाई एयर फोर्सका माथिल्लो स्तरका कमाण्डरले आफूमाथि बलात्कार गरेको बताएकी छन् ।
सिनेटर मार्था म्याक्सेलीले आफू एयर फोर्समा कार्यरत रहँदा सो घटना भएको आफ्ना सहकर्मीसँग भनेकी हुन् ।
उनी अमेरिकी फाइटर बिमानकी पहिलो चालक हुन् । उनले सैनिक सेवामा हुने यौन शोषणका विषयमा आफ्नो धारणा राख्ने क्रममा आफूमाथि बलात्कार भएको खुलासा गरेकी हुन् ।
एरिजोनाकी रिपब्लिकन सिनेटर म्याक्सेलीले आफूले त्यसबेला लाज, अन्योल र सेनाभित्रको प्रणालीका कारण बलात्कारको रिपोर्ट नगरेको उल्लेख गरिन् । सन् २०१७ मा अमेरिकी सेनामा करिब १० प्रतिशत बलात्कारका घटनामा वृद्धि भएको रिपोर्ट बाहिर आएको छ ।
उनले सिनेको सशस्त्र सेवा उपसमितिमा भनिन्, ‘म धेरै वर्षसम्म मौन बसेँ ।’ सन् २०१० मा अवकाश पाउनुअघि उनले करिब २६ वर्ष अमेरिकी हवाई सेनामा काम गरेकी थिइन् ।
गत वर्ष सिनेटमा निर्वाचित हुनुअघि उनी २ पटक तल्लो सदन प्रतिनिधिसभा सदस्यमा निर्वाचित भएकी थिइन् ।
