केपी र माधवले माफी नमागे पार्टीकै नेताहरूबाट अभियान चलाइने

 

नेपाल कम्युनिस्ट पार्टी (नेकपा) स्थायी समितिको बैठकले प्रधानमन्त्री एमम् पार्टी अध्यक्ष केपी शर्मा ओली र वरिष्ठ नेता माधवकुमार नेपालले आफ्नो गल्तीका निम्ति सार्वजनिक रूपमै ‘माफी माग्नुपर्ने’ निर्णय गरेको छ ।

 

कम्युनिस्ट परम्परामा आत्मालोचनालाई माफीका रूपमा बुझिन्छ र सामान्यतया बैठकमा आफ्नो गल्ती स्वीकार गरेपछि आइन्दा त्यस्तो गल्ती दोहोरिन नदिने प्रतिबद्धता जनाएको मानिन्छ । तर, प्रधानमन्त्री ओली र वरिष्ठ नेपालले बैठकमा आत्मालोचना गरेर छुट पाएनन् । दुवैले सार्वजनिक रूपमा वक्तव्य नै जारी गरी आत्मालोचना अर्थात् माफी माग्नुपर्ने ‘आदेश’ स्थायी समितिको छ ।

 

यदि सार्वजनिक रूपमा आत्मालोचना गरिएन भने यही विषयलाई मुद्दा बनाएर प्रधानमन्त्री केपी ओली र माधव नेपालको सार्वजनिक आलोचना गर्ने अभियान पार्टीभित्रैबाट चलाइने बुझिएको छ ।

 

युनिफिकेसन चर्चद्वारा आयोजित एसिया प्यासिफिक समिटमा सरकारको सहभागिता हुनु र सरकारलाई सहभागी गराउन माधवकुमार नेपालले मुख्य भूमिका निर्वाह गर्नुलाई उनीहरूको गम्भीर गल्ती मानिएको छ । विवादास्पद गैरसरकारी धर्म प्रचारक संस्था युनिफिकेसन चर्च तथा त्यसका नेपाली प्रतिनिधि एकनाथ ढकालसँगको सम्बन्धलाई लिएर स्थायी समिति बैठकमा माधवकुमार नेपालको व्यापक आलोचना भएको थियो ।

 

विगतदेखि नै माधवनिकटका मानिने नेताहरू भीम रावल, रघुजी पन्त, योगेश भट्टराई र घनश्याम भुसाल तथा पार्टी प्रवक्तासमेत रहेका वरिष्ठ नेता नारायणकाजी श्रेष्ठले माधव नेपालको तीव्र आलोचना गरेका थिए । ‘माधव कमरेडले आत्मालोचना गरेर मात्र हुन्न, सार्वजनिक रूपमै माफी मागिनुपर्छ’ भन्ने भनाइ नेता माधवकै निकटवर्तीहरूको थियो ।

 

त्यस्तै, क्रिश्चियनहरूको एउटा विवादास्पद गैरसरकारी संस्थासँग सहकार्य गर्नु सरकारको गम्भीर गल्ती भएको र यस घटनाले सरकार तथा कम्युनिस्ट आन्दोलनलाई ठूलो क्षति पुर्याएको भनी प्रवक्ता नारायणकाजी श्रेष्ठले व्यक्त गरेको विचारमा सहभागी अधिकांश नेताहरूले सहमति जनाएका थिए ।

 

ता श्रेष्ठले ‘आफूबाट प्रधानमन्त्रीजीलाई सचेत गराउने काम पहिले नै भएको, तर उहाँले बेवास्ता गर्नुभएको’ भन्दै गल्ती स्वीकार गर्नुको कुनै विकल्प नभएको धारणा प्रकट गरेका थिए । पैंतालीस सदस्यीय स्थायी समितिका अधिकांश सदस्यले प्रधानमन्त्री केपी ओली र माधवकुमार नेपालबाट कम्युनिस्ट आन्दोलन तथा कम्युनिस्ट सरकारको छविलाई गम्भीर क्षति पु¥याउने काम भएको धारणा व्यक्त गरेपछि अन्ततः दुवै नेताहरूले आ–आफ्ना गल्तीका निम्ति सार्वजनिक रूपमै आत्मालोचना गर्नु (माफी माग्नु) पर्ने निष्कर्षमा बैठक पुगेको थियो । बैठकको भावना र निर्णयअनुसार केपी र माधवबाट सार्वजनिक वक्तव्यमार्फत आत्मालोचना गरिने विश्वास स्थायी समितिका सदस्यहरूले गरेका छन् ।

 

यदि दुई शीर्ष नेताबाट सार्वजनिक आत्मालोचना भएन भने केही दिनपछि नै पार्टीका जिम्मेवार नेताहरूबाट केपी र माधवको इसाई सम्बन्ध तथा एसिया प्यासिफिक समिटमा सरकार आफैँ सहआयोजक बनेकोले त्यसबाट कम्युनिस्ट आन्दोलनलाई ठूलो क्षति पुगेको भनी सार्वजनिक रूपमै आलोचना र विरोध अभियान शुरु हुने बताइएको छ । तर, केपी र माधवले कति दिनभित्र सार्वजनिक आत्मालोचना नगरे उनीहरूविरुद्ध अभियान चलाइने हो, सो भने स्पष्ट गरिएको छैन ।

 

केपीनिकट मानिने एक स्थायी समिति सदस्यले आत्मालोचनाका निम्ति समय निर्धारण नगरिएको र नेताहरूले गल्ती भएको भनी आफ्नो सुविधाअनुसार धारणा सार्वजनिक गर्ने जानकारी घटना र विचारलाई गराएका छन् । निजका अनुसार नेताहरूले विज्ञप्ति नै जारी गरेर गल्ती स्वीकार गर्नुपर्छ भन्ने होइन, उपयुक्त समय र ठाउँमा नेताहरूबाट स्वीकारोक्ति हुन सक्छ । तर, स्थायी समितिका अधिकांश सदस्य जनताले बुझ्ने र थाहा पाउने गरी गल्ती स्वीकार गर्नुपर्छ भन्ने धारणा राख्छन् ।

 

केही दिनभित्रै सार्वजनिक आत्मालोचना नगरे पार्टी नेताहरूबाट विरोध शुरु गरिने भएको छ, स्थायी समितिका अधिकांश सदस्यहरू त्यस निम्ति तयार भएका छन् ।

 

केपी ओली र प्रचण्डद्वारा प्रस्तुत प्रतिवेदनलाई पनि परिमार्जनसहित पारित गर्ने निर्णयमा स्थायी समिति पुगेको छ । प्रतिवेदन परिमार्जन या सुधार गर्नुपर्ने कुनै कारण र अवस्था नरहेको भन्दै अड्डी लिएर बसेका प्रधानमन्त्री केपी शर्मा ओली बैठकको भावना बुझेपछि धेरै मत्थर बनेको र प्रतिवेदनमा सुधार गर्न तयार भएको बुझिएको छ । प्रधानमन्त्री ओली बहुदलीय जनवादको अपरिहार्यता र औचित्य अझै रहेको धारणा राख्छन् भने प्रचण्डसहितका अधिकांश नेताहरू पुँजीवादी क्रान्तिको चरण पार गरेकोले अब समाजवादी क्रान्तिको दिशातर्फ अघि सर्नुपर्ने अडानमा छन् ।

 

ज्ञातव्य छ, कम्युनिस्ट नेताहरूको दृष्टिमा समाजवादी क्रान्ति भन्नाले निजी सम्पत्तिको उन्मूलन, राज्य–नियन्त्रित अर्थ–प्रणाली र कम्युनिस्ट पार्टीको एकलौटी राज्यसत्ता हो । प्रचण्डको हातमा पार्टीको सम्पूर्ण नेतृत्व पुगिसकेपछि उनले एकदलीय राजनीतिक अभ्यासको थालनी गरिने धेरैले ठानेका छन् ।घटना र विचारबाट