नेपाली विद्यार्थीको मृत्युको कारण खुल्यो, अष्ट्रेलियन नागरिकको नजरमा ‘हिरो’ बनेर अस्ताए उनी
अष्ट्रेलियामा निधन भएका नेपाली विद्यार्थी निश्चल घिमिरेको मृत्युको कारण खुलेको छ ।
अनुसन्धान अनुसार, आफूले रेखदेख गर्दै आएको बालकलाई बचाउने क्रममा डुबेर उनको मृत्यु भएको हो ।
सेभेन न्युजसंगको कुराकानीमा बालकको परिवारले आफ्नो बच्चाको जीवन रक्षाको लागि जीवन बलि दिएका निश्चल आफूहरुको लागि हिरो रहेको बताएका छन् ।
उनीहरुले निश्चल सधै एक असल व्यक्ति रहेको तथा आफूहरुले अत्यन्तै माया गर्ने गरेको र सधै उनलाई याद गरिरहने बताएका छन् ।
२२ वर्षीय निश्चल बिहिबार बेलुका ४ बजे देखि हराइरहेका थिए ।
ग्लेनेल्ज समुद्री किनारबाट हराएका उनको सकुशल उद्धारको लागि प्रहरी खटिएको थियो ।
तर, शुक्रबार साँझ ७:३० बजे बोट र्याम्पमा उनको शव भेटिएको थियो । परिवारका कान्छा छोरा निश्चल तीन वर्ष अघि अष्ट्रेलिया आएका थिए ।
निश्चल एडिलेडस्थित क्लेयरेन्स पार्कमा बसोबास गर्दै आएका थिए ।
नर्सिङ्ग पेशामा आबद्ध उनले १० वर्षीय बोल्न नसक्ने एक बालकको हेरचाह गर्दै आएका थिए ।
बिहिबार पनि उनी बालकलाई लिएर समुद्री किनारमा पुगेका थिए ।
हराउँदा निश्चलको कार, पर्स र लुगा र मोबाइल समुद्र तटमै समुद्री किनारमा थियो भने बालक अत्तालिंदै एक घरको ढोका ढक्ढकाउन पुगेका थिए ।
