प्रस्तावित प्रधानन्यायाधीश राणाकाे सुनुवाइ जारी
प्रस्तावित प्रधानन्यायाधीश चोलेन्द्र शमशेर राणाको विषयमा संघीय संसद अन्तरगत संसदीय विशेष सुनुवाइ समितिमा सुनुवाइ भइरहेको छ ।
यस क्रममा राणाले न्यायीक सुशासन कायम गर्ने र भ्रष्टाचारमा शुन्य शहनशीलता अपनाउने प्रतिवद्धता व्यक्त गरेका छन् । साथै भ्रष्टाचार तथा न्यायीक विचलन गर्ने व्यक्तिको खोजी गर्ने पनि उनले बताएका छन् ।
उच्च अदालतमा न्यायाधीशको रुपमा आउँदा ‘ब्ल्याकमेल’ गरेको, शिवकुमार मण्डलको जग्गाको फैसला गर्दा बिचौलियासँग साँठगाँठ गरेको लगायत विषयमा राणामाथि समितिमा प्रश्न उठाइएको छ । राणामाथि अहिले पनि प्रश्न सोध्ने क्रम जारी छ ।
सार्वजनिक जग्गा आफन्तको नाममा कायम गराएको, मुद्दा फैसलामा आर्थिक चलखेल गरेको, पूर्व युवराज्ञी प्रेरणाको दाइजो सम्बन्धी मुद्दामा वदनियत राखेको लगायतका ९ वटा संगीन आरोपसहित उजुरी परेका जवराको विषयमा हुन गइरहेको आजको सुनुवाइलाई निकै चासोका साथ हेरिएको छ ।
आरोपै–आरोपले घेरिएर सर्वोच्चका जवराका लागि आजको सुनुवाइले सर्वोच्चको ढोका खोल्छ कि खोल्दैन भन्ने कुरा अहिले सर्वत्र चासोको विषय बनेको छ । आज दिउँसो २ बजे बस्ने समितिको बैठकमा सुनुवाइका लागि राणालाई बोलाइएको छ ।
विभिन्न समयमा भएका फैसला तथा व्यक्तिगत विषयमा प्रस्तावित प्रधानन्यायाधीश राणाविरुद्ध नौवटा उजुरी परेका छन् । उक्त उजुरी तथा उनका भावी कार्ययोजनाका विषयमा आज छलफल हुने संघीय संसद सचिवालयले जनाएको छ । सुनुवाइपछि राणाको नाम अनुमोदन गर्ने–नगर्ने निर्णय हुनेछ ।
यसअघि गत शुक्रबार बसेको बैठकमा उजुरीकर्तासँग छलफल गरिएको थियो । प्रधानन्यायाधीश ओमप्रकाश मिश्रले उमेर हदका कारण आगामी मंगलबार अनिवार्य अवकाश पाउने भएकाले त्यसअघि नै प्रस्तावित प्रधानन्यायाधीशको सुनुवाइ सक्ने तयारी संसदीय समितिले गरेको हो । समितिले नाम अनुमोदन गरेपछि राष्ट्रपतिले प्रधानन्यायाधीश नियुक्ति गर्ने संवैधानिक व्यवस्था छ ।
