एमाले जनताको बहुदलीय जनवादको मार्गदर्शनमा अघि बढछ : विद्या भण्डारी
नेकपा एमालेकी वरिष्ठ नेता विद्या भण्डारीले पार्टीका बारेमा फैलाइएका भ्रम, गलत सूचना र अफवाहको तथ्य र प्रमाणका आधारमा खण्डन गर्नुपर्ने बताएकी छन् । प्रवासी नेपाली मञ्च अन्तर्राष्ट्रिय कमिटीको दोस्रो अधिवेशनलाई सम्बोधन गर्दै एमाले जनताको बहुदलीय जनवादको मार्गदर्शनमा अघि बढ्दै आएको पार्टी भएको बताइन् ।
एमाले मुलुकमा लोकतान्त्रिक प्रणालीको स्थापना र सुदृढीकरण, राष्ट्रिय स्वाभिमान तथा सार्वभौमसत्ताको रक्षा र सामाजिक आर्थिक रूपान्तरणमा योगदान गर्दै आएको प्रमुख राजनीतिक दल भएको जिकिर गरिन् ।
उनले भने, ‘यस पार्टीले देश र जनताको हितमा गरेका काम तथा हासिल गरेका उपलब्धिबारे सही जानकारी प्रवाह हुनु र तिनको वस्तुनिष्ठ मूल्याङ्कन हुनु आवश्यक छ । पार्टीका बारेमा फैलाइएका भ्रम, गलत सूचना र अफवाहको तथ्य र प्रमाणका आधारमा खण्डन गर्नु पर्दछ । महिला र युवालाई नेतृत्वमा अघि बढ्ने अवसर र वातावरण सिर्जना गर्नुपर्ने समेत बताइन् ।
उनले भनिन्, ‘प्रवासमा रहेका सबै नेपालीको अवस्था र आवश्यकता एउटै पनि छैन र हुँदैन । तर श्रमिक, विद्यार्थी, व्यवसायी, महिला, युवा र विभिन्न पेसामा संलग्न नेपालीका समस्या आफ्नै छन् र समस्या र सरोकारहरू पनि छन् । ती सबैलाई समेटेर सङ्गठनका गतिविधि अघि बढाउनु पर्छ ।
स्वदेशी निजी क्षेत्रसँग जोडिएर उद्योग स्थापना, रोजगारी सिर्जना र प्रविधि हस्तान्तरणमा पनि प्रोत्साहित गर्नुपर्नेमा जोड दिइन् । सरकारले लगानीमैत्री वातावरण, नीतिगत स्थिरता र लगानीको सुरक्षा सुनिश्चित गर्न आवश्यक रहेको बताइन् ।
