दाङमा बस दुर्घटना, १० जनाको मृत्यु
सल्यानबाट दाङको तुलसीपुर आउँदै गरेको बस दुर्घटना हुँदा १० जनाको मृत्यु भएको छ । मृत्यु हुनेमा १ जना महिला ८ जना पुरुष रहेका जिल्ला प्रहरी कार्यालय दाङले जनाएको छ ।
तुलसीपुर उप-महानगरपालिका ३ राम्री भन्ने ठाउँमा बा ४ ख ९७६६ नम्बरको बस सडकबाट ६/७ सय मिटर तल खसेर दुर्घटना भएको प्रहरीले जनाएको छ । दुर्घटनास्थलमा प्रहरी पुगेर उद्दार सुरु गरेको छ ।
इलाका प्रहरी कार्यालय तुलसीपुरबाट प्रहरी नायब उपरीक्षक (डीएसपी) प्रेम शाही नेतृत्वको १९ जनाको टोली र जिल्ला प्रहरी कार्यालयबाट प्रहरी निरीक्षक राजनकुमार गौतमको कमाण्डमा १७ जनाको प्रहरी टोली खटिएको छ ।
दुर्घटनास्थल तुलसीपुरबाट १३ किलोमिटर उत्तरमा पर्छ । प्रहरीले चार जना घाइतेलाई उपचारका लागि राप्ती अञ्चल अस्पताल ल्याएको छ ।
