टोखामा महिलाले गरिन् सौताको घाँटी थिचेर हत्या
काठमाडौंको टोखा नगरपालिका–८, मिलन टोलमा एक महिलाले गएराति सौताको हत्या गरेकी छन् । अन्य आफन्त समेतलाई संलग्न गराएर उनले मुगुको टोरु गाउँपालिका–८ घर भएकी २३ वर्षीया अजिता मल्ल शाहीको हत्या गरेकी हुन् ।
हत्या आरोपमा प्रहरीले मुगुको सोरू गाउँपालिकाकी २६ वर्षीया विष्णुमाया मल्लसहित उनकी बहिनी, भदा र भदाको श्रीमतीलाई पक्राउ गरेको छ । महानगरीय अपराध अनुसन्धान महाशाखाका प्रमुख एसएसपी धिरजप्रताप सिंहका अनुसार उनीहरुमाति कर्तव्य ज्यान मुद्दामा म्याद थप गरेर विस्तृत अनुसन्धान थालिनेछ ।
स्रोतका अनुसार श्रीमान धर्मराज शाही भने मुगुमा छन् । उनी सोमबार नै काठमाडौं आउँदैछन् । उनीहरु त्यहाँ डेरामा बस्दै आएका थिए ।
पर्शुरामको हत्या भएको भन्दै तिलाठीमा चक्काजाम
सप्तरी । तिलाठी-कोइलाडी गाउँपालिका-१ तिलाठीका पर्शुराम मिश्रको हत्या भएको भन्दै स्थानीयवासीले प्रदर्शन गरेका छन् ।
पर्शुरामको कुटपिट गरी हत्या गर्नेलाई कार्वाहीको माग गर्दै स्थानीयवासीले सोमबार राजविराज-कुनौली सडकखण्ड चक्काजाम समेत गरेका छन् ।
मिश्रलाई बिहीबार राति वडानम्बर-३ लौनियाँका केही युवाहरु मिलेर निर्घात कुटपिट गरेका थिए । कुटपिटबाट गम्भीर घाइते भएका मिश्रको राजविराजस्थित गजेन्द्रनारायण सिंह सगरमाथा अंचल अस्पतालमा प्राथमिक उपचार गराई थप उपचारका लागि विराटनगर लगिएको थियो । उनको उपचारको क्रममा आइतबार मृत्यु भएपछि स्थानीयहरु आन्दोलित भएका हुन् ।
गाउँपालिकाको वडानम्बर १ तिलाठीका पालेसमेत रहेका मिश्रलाई लौनियाँका शैलेन्द्र मुखियासहितले कुटपिट गरेको स्थानीयको भनाइ छ । मिश्रको मृत्यु भएपछि उनीहरु फरार भएका छन् ।
स्थानीयहरुले राजविराज-कुनौली सडकखण्डमा टायर बालेर सडक अवरुद्व गर्दै बिहानैदेखि प्रदर्शन गरिरहेका छन् ।
यता सप्तरीका प्रहरी प्रमुख, प्रहरी उपरीक्षक (एसपी) राजेन्द्र बिष्टले कुटपिट गर्नेहरुको खोजी भइरहेको जानकारी दिए ।
