दाङमा बस र स्कार्पियो ठोक्किँदा बेहुलाका बाबुआमासहित ६ को मृत्यु
दाङको लमही नगरपालिका वडा नम्बर ९ रिहार नजिक बस र जिप ठोक्किदा ६ जनाको मृत्यु भएको छ भने दुई जना घाइते भएका छन् ।
महेन्द्रनगरबाट काठमाडौं जाँदै गरेको ना ५ ख ४०९० नम्बरको बस र बेहुली लिएर चितवनको गितानगरबाट बाँकेको शमसेरगञ्ज जाँदै गरेको बा १२ च ३१२२ नम्बरको स्कारपियो जिप ठोक्किएका हुन् । दुर्घटनामा जिपमा सवार ८ जनामध्ये ६ जनाको मृत्यु भएको छ ।
मृत्यु हुनेहरुमा राप्ती सोनारी गाउँपालिका वडा नम्बर ८ निवासी ५३ वर्षीय मानबहादुर केसी, ४५ वर्षीया विमला खत्री, ४९ वर्षीय बिश्वनाथ अधिकारी, ५ वर्षीय प्रविण केसी, ३१ वर्षीय दिपककुमार खड्का र कोहलपुर नगरपालिका १२ निवासी ७८ वर्षीय दत्तबहादुर खत्री रहेको इलाका प्रहरी कार्यालय अमिलियाले जानकारी दिएको छ । मृतक मानबहादुर केसी र विमला खत्री बेहुलका आमा-बुवा हुन् ।
बेहुली र बेहुला भने अर्काे गाडीमा थिए । बुवा-आमा र आफन्त चढेको जिप भने विपरित दिशाबाट आइरहेको बससँग ठोक्किएको हो । दुर्घटनामा बेहुलाकै आफन्त ४५ वर्षीया गितादेवी खत्री र चालक २१ वर्षीय यमबहादुर मगर घाइते छन् । उनीहरुलाई उपचार गर्न बाँकेको कोहलपुर पठाइएको प्रहरीले जनाएको छ ।
