प्रधानसेनापति थापाविरुद्ध उपरथी बस्न्यातले दिए उजुरी

हाम्रो इकोनोमि

 

बढुवा रोक्न खोजेको आरोप लगाउँदै नेपाली सेनाका उपरथी अनुज बस्न्यातले प्रधानसेनापति पूर्णचन्द्र थापा विरुद्ध उजुरी दिएका छन् । नेपाली सेनाको निरीक्षणाधिकृत विभाग प्रमुख रहेका उपरथी बस्न्यातले बिहीबार प्रधानसेनापति थापाविरुद्ध रक्षा मन्त्रालय र उपप्रधान तथा रक्षामन्त्री ईश्वर पोखरेलसमक्ष उजुरी दिएका हुन् ।

 

बस्न्यात करिब ९७ हजार फौज कार्यरत सेनाको बरीयतामा तेस्रो नम्बरमा छन् । रथीमा बढुवा नभए बस्न्यातले मंसिर २५ गतेबाट अनिवार्य अवकाश पाउने छन् ।

 

बस्न्यातले उजुरीको बोधार्थ प्रधानसेनापति थापालाई पनि दिएका छन् । भदौ २४ गतेबाट रिक्त रहेको रथी (बलाध्यक्ष रथी) पद पूर्ति नगरेर आफूलाई अवकाशमा पठाउन लागेको आरोप लगाउँदै बस्न्यातले प्रधानसेनापति थापाविरुद्ध उजुरी दिएको रक्षा मन्त्रालय स्रोतले जानकारी दियो ।

 

प्रधानसेनापति थापाविरुद्ध केही महिना अघिमात्रै उपरथी बढुवामा असन्तुष्टि जनाउँदै सहायक रथी नैनराज दाहालले सर्वोच्च अदालतमा दायर गरेको उजुरी अझै विचाराधीन छ ।

 

“उहाँ (उपरथी अनुज बस्न्यात)ले उपप्रधान तथा रक्षामन्त्रीज्यूलाई भेटेरै प्रधानसेनापतिले आफ्नो बढुवा रोकेको विषयमा मौखिक र लिखित रुपमा जानकारी दिनु भएको छ,” रक्षा मन्त्रालय स्रोतले भन्यो, “उजुरी बुझेपछि उपप्रधानमन्त्रीले रथीजस्तो महत्वपूर्ण पद खाली राखिनु हुँदैन,

 

रोकिएको बढुवा छिट्टै खुल्छ भन्ने प्रतिवद्धता जनाउनु भएको छ ।”
रक्षामन्त्रीलाई भेट्नुअघि उपरथी बस्न्यातले आफ्नो बढुवा किन रोकियो भन्दै प्रधानसेनापतिलाई समेत भेटेर असन्तुष्टि जनाएको सैनिक स्रोतले बतायो ।

 

बस्न्यातले रक्षामन्त्री पोखरेल र मन्त्रालय समक्ष प्रवेशिका, प्रमाणपत्र र स्नातक तहका शैक्षिक प्रमाणपत्र, सैनिक परिचयपत्र, सञ्चयकोष परिचयपत्र, जिल्ला प्रशासन कार्यालय काठमाडौंबाट जारी भएको आफ्नो नागरिकता र नागरिकता कुन सालमा जारी भएको भन्नेबारे काठमाडौं प्रशासन कार्यालयबाट प्रमाणित कागजात पनि पेश गरेका छन् ।

 

प्रधानसेनापति थापाले देशभर कार्यरत ७ हजारभन्दा बढी सैनिक अधिकृतहरूको शैक्षिक प्रमाणपत्र छानविन भइरहेको र उपरथी बस्न्यातको पनि शैक्षिक प्रमाणपत्र तथा नागरिकता छानबिनका क्रममा रहेकोले बढुवा अघि नबढेको उनी निकट स्रोतले जानकारी दियो ।
तर, उपरथी बस्न्यातले आफ्नो सम्पूर्ण शैक्षिक प्रमाणपत्र लगायतका प्रमाणित कागजात समेत पेश गर्दै बढुवा प्रक्रिया अघि बढाउन आग्रह गरेको स्रोत बताउँछ ।

 

बस्न्यातको बढुवा भएन भने नेपाली सेनाभित्र भावी प्रधानसेनापतिको रोलक्रममै असर पुग्ने सैनिक उच्च स्रोतको दाबी छ । केही महिना अघिमात्रै प्रधानसेनापति थापाविरुद्ध उपरथी बढुवा विवादमै सहायक रथी नैनराज दाहालले सर्वोच्च अदालतमा मुद्दा दायर गरेका थिए ।

 

उनको बढुवा भइदिएको भए ६ वर्षपछि प्रधानसेनापति बन्न सक्थे । उपरथी बढुवाका लागि पहिलो नम्बरमा रहेका दाहालको शैक्षिक प्रमाणपत्रमाथि प्रश्न उठाउँदै प्रधानसेनापति थापाले अन्य २ कनिष्ठ सहायक रथीलाई बढुवा गरेपछि दाहाल आफ्नो शैक्षिक प्रमाणको वैधानिकता जाँच र बढुवा वदरको माग गर्दै सर्वोच्च अदालत गएका थिए ।

 

तर मुद्दाको किनारा नलाग्दै दाहालले कात्तिक ३० गतेबाट पदावधिका कारण अवकाश पाइसकेका छन् । दक्षिण सुडानस्थित संयुक्त राष्ट्रसंघीय शान्ति मिसन अन्तर्गत सेक्टर कमान्डर रहेका दाहाल अवकाश पाएपछि बीचमै राजीनामा दिएर फिर्ता भएका थिए ।

 

सैनिक ऐन र नियमावली अनुसार प्रधानसेनापति थापाले दाहालको पदावधि १ वर्ष थप्न मन्त्रीपरिषद्समक्ष सिफारिस गर्न सक्थे । तर आफू विरुद्ध अदालतमा मुद्दा दायर गरेपछि थापा दाहालसँग असन्तुष्ट थिए ।कारोबारबाट