सचिवलाई गार्ड राखेर ओलीले मन्त्रीहरूको परीक्षा लिएपछि सिंहदरबारमा हंगामा

 

प्रधानमन्त्री केपी शर्मा ओली नेतृत्वको कम्युनिस्ट सरकारले जनअपेक्षा अनुसार काम गर्न नसकेको भन्दै सर्वत्र आलोचना हुन थालेपछि समीक्षा शुरू भएको छ ।

 

प्रधानमन्त्री ओलीले मन्त्रीको परीक्षा लिने भनेर चर्चा चलेझै बुधवार मन्त्रीको प्रगति विवरण मागेका छन् । तर मन्त्रालयका सचिवकै सामुन्ने मन्त्रीलाई अपमानित गर्दै प्रधानमन्त्री ओलीले परीक्षा लिएपछि मन्त्रीहरू असन्तुष्ट बनेका छन् ।

 

ओलीको यस्तो कार्यशैलीबाट आक्रोशित मन्त्रीहरूका कारण सिंहदरबारमा हंगामा मच्चिएको छ । सचिवसामु मन्त्री हेपिएपछि सिंहदरबारभित्र सरकारी कर्मचारीले मन्त्रीलाई टेर्न छाडेको गुनासो गरिएको छ । मन्त्रीको निर्देशन अनुसार सचिवले काम नगरेपछि प्रभावकारी काम हुने कल्पना समेत गर्न सकिँदैन ।

 

मन्त्रीसँगको छलफलमा प्रधानमन्त्री केपी शर्मा ओलीले ढिलासुस्ती स्वीकार्य नभएको बताए । बजेट कार्यान्वयन समीक्षा बैठकमा प्रधानमन्त्री ओलीले सरकार गठनको नौ महिनासम्म पनि पुरानै बानी नहटेको भन्दै असन्तुष्टि जनाएका हुन् ।

 

‘एउटा टेवलबाट अर्को टेवलमा फाइल सर्न कैयौं दिन लाग्ने, सिंहदरवारको एउटा कार्यलयबाट अर्को कार्यलयमा पत्र पुग्न महिनौं लाग्ने । यो पाराले कसरी अघि बढ्न सकिन्छ ?’ मन्त्री तथा सचिवहरू उपस्थित बैठकमा उनले भने ।

 

प्रधानमन्त्री ओलीले प्रधानमन्त्री तथा मन्त्रिपरिषद कार्यालयबाटै ढिलासुस्ती भएको भए पनि भन्न आग्रह गरे । ‘ऐन कानुनले ढिलासुस्ती भएको छ भने त्यो पनि भन्नुहोस् । त्यस्ता ढिलासुस्तीका कारणलाई निरुपण गर्नेतर्फ मेरो ध्यान जान्छ,’ उनले भनेका छन्, ‘तर अब कहीँ पनि ढिलासुस्ती स्वीकार्य छैन ।’

 

विकास र जनताको काम गर्न कसैले पनि ‘तर, पनि, यदि’ भनेर उन्कन नपाउने उनले बताए । ‘सबैले परिणाम दिने गरी र परिवर्तन देखिने गरी काम गर्नुहोस्,’ प्रधानमन्त्री ओलीको भनाइ उद्धृत गर्दै निजी सचिवालयले भनेको छ, ‘आफ्ना कमजोरीहरुलाई तर्कको लेपनले टाल्न नखोज्नुहोस् भन्नुभएको छ ।’

 

प्रधानमन्त्री ओलीले कार्यप्रगति सुधार गर्न निर्देशन दिएपनि उनको प्रस्तुतीले मन्त्रालयको कामकारवाही झनै प्रभावित हुने देखिएको छ । सचिवकै सामु मन्त्रीहरू अपमानित भएपछि भोलिदेखि मन्त्रालयमा मन्त्री र सचिवको द्वन्द्व झनै बढ्ने देखिएको छ ।

 

बैठकमा भौतिक पूर्वाधार, सूचना प्रविधि, उर्जा, कृषि, उद्योग मन्त्रालय र पुननिर्माण प्राधिकरणका सचिवले आ–आफ्नो चौमासिक प्रगति विवरण पेश गरेका थिए ।

 

प्रधानमन्त्रीसँगको छलफलपछि एक मन्त्रीको सचिवालयका सदस्यले भने, ‘यो त प्रधानमन्त्रीज्यूबाट सचिवलाई गार्ड राखेर मन्त्रीको परीक्षा लिएजस्तै भयो । यस्तो गरेपछि सचिवले मन्त्रीलाई कसरी टेर्छन् ?’ प्रधानमन्त्री ओलीको व्यवहारले सचिवहरूले अपमानजनक शैली अपनाएको महसुस गरेका छन् ।