पैसाको लोभमा महिलाको हत्या गर्ने पक्राउ
शारदा नगरपालिका–८ मार्केको सिमखर्ककी ५० वर्षीया केवली नेपालीको हत्या गर्ने युवकलाई प्रहरीले बिहीबार सार्वजनिक गरेको छ ।
चोरी गर्ने उद्देश्यले महिलाको घरमा गएर हत्या गर्ने शारदा नगरपालिका ८ सिमखर्क बस्ने १९ वर्षीय राजु भनि चिनिने बीरबहादुर बस्नेत रहेको प्रहरीले जनाएको हो । प्रहरीका अनुसार असोज २५ गते राती ति युवकले महिलाको घाँटी रेटेर हत्या गरेको स्वीकार गरेका छन् ।
श्रीमानको मृत्यु पश्चात मृतक नेपाली लामो समयदेखि तिन छोरा र दुई छोरीहरुसँग भारतमा बस्दै आएकी थिईन् । दसैँ मनाउन असोज २२ गते घर फर्किएकी थिईन् ।
भारतबाट दसैँ मनाउन आएकाले ति महिलासँग धेरै पैसा हुन सक्छ भनि चोरी गर्न गएका ति युवकले दुई सय रुपैयाँ मात्रै फेला पारेपछि महिलाको हत्या गरेको जनाइएको छ ।
नेपालीको घाँटीमा डोरी कसी धारिलो चक्कुले रेटी हत्या गरेको अनुसन्धानबाट खुल्न आएको सल्यान प्रहरी प्रमुख डिएसपी बिरेन्द्रबहादुर शाहीले बताए ।
बलात्कारको आरोपमा पक्राउ
उदयपुर त्रियुगा नगरपालिका–१४ बस्ने ४५ वर्षीया बोल्न नसक्ने महिलालाई जंगलमा लगी बलात्कार गरेको आरोपमा एक जना पक्राउ परेका छन् ।
पक्राउ पर्नेमा सोही ठाउँ बस्ने २० वर्षीय किशोर नेपाली रहेका छन् । उनलाई मंगलबार दिउँसो प्रहरीले पक्राउ गरेको हो ।
यसैबीच तेह्रथुम छथर गाउँपालिका–१ आङदिम बस्दै आएकी धनकुटा महालक्ष्मी नगरपालिका–९ की १७ वर्षीया बोल्न नसक्ने महिलालाई
विगत ३-४ महिना अगाडि जबरजस्ती करणी गरी गर्भवती बनाएको अभियोगमा तीन जना पक्राउ परेका छन् ।
पक्राउ पर्नेमा ५७ वर्षीय रुद्रबहादुर मगर, डम्बरबहादुर मगर र अजयकुमार मगर रहेका छन् । उनीहरुको थप अनुसन्धान भइरहेको प्रहरीले जनाएको छ ।
उपचार गर्ने निहुँमा निर्घात कुटपिट
स्याङ्जाको वालिङ्मा उपचार गर्ने निहुँमा एक पुजारीले युवतीलाई निर्घात कुटपिट र दुर्व्यवहार गरेका छन् ।
वालिङ नगरपालिका १४ डाडाँखर्क निवासी २१ वर्षीया खगीसरा कुवँरलाई आफूलाई झाँक्री बताउने रामबहादुर थापा (रितबहादुर) ले कुटपिट गरेका हुन् ।
कोजाग्रत पूर्णिमाका दिन भीरकोट ५ स्थित स्वरेक कालिका मन्दिरमा थापाले बिरामी भएकी २१ वर्षीया कुवँरलाई अभद्र व्यवहार गर्दै कुटपिट गरेको बताइए पनि प्रहरीले भने निवेदन नदिएको जनाएको छ ।
इलाका प्रहरी कार्यालय वालिङका प्रहरी निरीक्षक शंकर आचार्यले पीडित पक्षले निवेदन नदिएको र यस बारेमा अनुसन्धान भइरहेको बताए ।
बुहारी मृत फेला, सासू बेपत्ता
बैतडीमा बुहारी घर नर्फकदा खोज्न गएकी सासू बेपत्ता भएकी छन् भने बुहारी मृत फेला परेकी छन् ।
बुधबार बिहान घाँस काट्न भनेर घरबाट निस्केकी दोगडाकेदार गाउँपालिका ४ श्रीकेदारकी बुहारी निर्मला भट्ट साँझ पर्दा पनि नफर्केपछि सासू पार्वती भट्ट बुहारी खोज्न गएकी थिइन् ।
दुवैजना रातीसम्म पनि घर नफर्किएपछी घरपरवारका अन्य सदस्य खोजी गर्न जंगल गएका थिए । खोजी गर्ने क्रममा बुहारी ओडीगाउँ जंगलमा झुण्डिएको अवस्थामा मृत फेला परेको प्रहरीले जनाएको छ ।
निर्मलालाई फेला पारे पनि पार्वती अहिलेसम्म फेला नपरेको प्रहरी चौकी खोचलेकका प्रहरी सहायक निरीक्षक श्यामसिंह महराले बताए ।
अहिले जिल्ला प्रहरी कार्यालय र खोचलेक प्रहरीचौकीबाट प्रहरी जंगलमा गएको जिल्ला प्रहरी कार्यलय बैतडीका डीएसपी नेत्रमणी गिरीले बताए ।घटना रहस्यमय रहेकोले थप अनुसन्धान अगाडि बढाईएको गिरीको भनाइ छ ।
