धरौटीमा छुटेका दुई उपसचिव तत्काल पक्राउ
काठमाडौं जिल्ला अदालबाट धरौटीमा छुटेका दुई उपसचिव तत्कालै पक्राउ परेका छन् ।
धरौटीमा छुटेका उनीहरुलाई अख्तियार दुरुपयोग अनुसन्धान आयोगले बुधबार पुनः पक्राउ गरेको हो । भारतीय व्यवसायी रामनिरञ्जन जटहियाको शंकर इलेक्ट्रोनिक्स कम्पनीको शेयर ट्रान्फरमा मिलेमतो गरेको भन्दै अख्तियारले उप–सचिवद्धय धर्मराज रोकाय र गंगाधर पौडेललाई पक्राउ गरको हो ।
यसअघि सरकारी वकिलको कार्यालयले कम्पनी रजिष्ट्रारको ६ जना कर्मचारीमाथि कार्बाही प्रक्रिया अघि बढाउन अख्तियारलाई पत्र काटेको थियो ।
रोकाय र पौडेललाई बुधबार नै पक्राउ गरेको अख्तियारका प्रवक्ता रामेश्वर दंगालले बताएका छन् । उनका अनुसार अब उनीहरु विरुद्ध भ्रष्ट्राचार ऐन अनुसार कारबाही प्रक्रिया अघि बढ्नेछ ।
७० करोड रूपैयाँ घोटला काण्डका दोषीहरुमाथि मंगलबार नै अदालतले ६ जना कर्मचारीलाई ४ लाख ५० हजार धरौटी लिई रिहा गरेको थियो भने ८ जनालाई थुनामा राख्न आदेश दिएको थियो ।
गत भदौ १७ गते कम्पनी रजिष्ट्रार कार्यालयमा सीआईबीले छापा मारेको थियो । सोही दिन ४ जना कर्मचारीलाई पक्राउ गरेको थियो भने २ जना उपसचिव फरार रहेका थिए । दुई जना उपसचिवले फैसला हुन भन्दा १ दिन आफैं अदालतमा उपस्थित भएका थिए ।
