प्रधानमन्त्री लिन थाईल्याण्डबाट आएको जहाज डेढ घण्टा आकाशमै रोकियो
बिमस्टेक शिखर सम्मेलनको क्रममा नेपालको एक मात्र विमानस्थलमा हवाई ट्राफिक व्यवस्थापन गर्न निकै कठिन भएको छ ।
हवाई ट्राफिक जामले काठमाडौं विमानस्थल अस्तव्यस्त मात्रै बनेन भिभिआईपीको उडानका लागि उच्च प्राथमिकता दिने निर्णय गरेको सरकारकै लागि टाउको दुखाईको विषय बन्यो ।
थाइल्याण्डका प्रधानमन्त्री प्रयुत ओ चालाई लिन आएको भिभिआईपी उडानको जहाज नै डेढ घण्टा आकाशमा फन्को मार्न बाध्य भयो ।
भारतबाट नेपाल आउने क्रममा रहेका अर्का भिआईपी राहूल गान्धीका कारण समेत हवाई ट्राफिक व्यवस्थापन थप चुनौतिपूर्ण बनेको बताइन्छ ।
बिमस्टेक सम्मेलन सकिए लगत्तै फर्कने कार्यक्रम रहेको थाईल्याण्डका प्रधानमन्त्री प्रयुत ओ चालाई लिन थाईल्याण्डको राजधानी बैंकबाट थाई लियोन एयरको जहाज मध्यान्ह १२ बजे उडेको थियो ।
सो जहाज अपरान्ह २ बजे काठमाडौंमा अवतरण गर्ने कार्यतालिका थियो । तर, काठमाडौंस्थित हवाई ट्राफिक जामका कारण सो जहाजले बारा र पर्साका आकाशमाथि १४ पटकसम्म फन्को मार्न बाध्य भयो ।
काठमाडौंस्थित विमानस्थलबाट बंगलादेशकी प्रधानमन्त्री शेख हसिनाको उडानको समय भएका कारण सबै जहाजहरु बाराको आकाशमाथि फन्को मारिरहेको, लियाने एयरको जहाजभन्दा तल दिल्ली काठमाडौं उडानमा रहेको जेट एयरवेज र मलेसिया काठमाडौं उडानमा रहेको एयर एसियाका जहाजलगायतका आठ वटा जहाजहरु रहेका कारण लियोन एयरको जहाजले तत्काल अवतरण गर्ने अनुमति नपाएको जनाइएको छ ।
भिभिआईपीको लागि भन्दै गैर सैनिक उडानका जहाजहरु होल्डमा भएपनि भिभिआईपीलाई नै लिन आएको जहाज नै १४ फन्को आकाशमा मार्नुपर्ने अवस्था आएको हो ।
बिमस्टेकमा सहभागी अतिथिहरु फर्कने क्रममा रहेकोले आज साँझसम्म नै काठमाडौंस्थित विमानस्थलमा अत्याधिक ट्राफिक जाम हुने देखिएको छ ।
आज फर्कने अन्तिम पाहुना भारतीय प्रधानमन्त्री नरेन्द्र मोदी फर्केपछि साँझ ७ बजेपछि भने केही सहज हुनेछ ।
