चीनको ५१ वर्षीय भिक्षुले गुम्बामा आनीहरुमाथि यौनशोष र दुर्व्यवहार गरेको गम्भिर आरोप
चीनको शीर्ष तहका एक बौद्ध भिक्षुमाथि यौनशोषणको गम्भिर आरोप लागेको छ ।
गत जुलाईमा चिनियाँ अधिकारीहरुसमक्ष प्रस्तुत गरिएको ९५ पृष्ठ लामो दस्तावेजमा सी सुचेङमाथि दुई बौद्ध भिक्षुले लोङकुवान गुम्बामा आनीहरुमाथि यौनशोषण तथा दुर्व्यवहार गरेको गम्भिर आरोप लगाइएको हो ।
यद्यपि, भिक्षुले आफूमाथि लगाइएका सम्पूर्ण आरोपहरुको खण्डन गरेका छन् ।
लोङकुवान गुम्बाका प्रमुख सुचेङ बुद्धिस्टि एशोसिएसन अफ चाइनाका हाइप्रोफाइल व्यक्ति हुन् । उनी चिनियाँ सरकारको राजनीतिक सल्लाहकार समेत रहेको सिएनएनले उल्लेख गरेको छ ।
५१ वर्षीय भिक्षुले बुधबार राती सामाजिक सञ्जाल वेइबोमा छोटो विज्ञप्ति जारी गर्दै आफूमाथि लगाइएको सबै आरोपहरु निराधार भएको बताए ।
गुम्बाको नाममा जारी विज्ञप्तिमा आम जनतालाई गुमराह गर्न तथ्यहीन आरोपहरु लगाइएको उनले आरोप लगाएका छन् । त्यस्तै, यस विषयमा सरकारलाई आधारिक छानविन गर्न माग पनि गरिएको विज्ञप्तिमा उल्लेख छ ।
यता, चीन सरकारको स्टेट एडमिनिस्ट्रेसन फर रिलिजियस अफेयर्सले पनि बिहिबार एक विज्ञप्ति जारी गर्दै सुचेङमाथि लागेको आरोपको मुद्दालाई उच्च प्राथमिकतामा राखेको र यसबारे अनुसन्धान प्रक्रिया शुरु भइसकेको बताएको छ ।
आरोपसहितको दस्तावेजमा सुचेङले कथितरुपमा छ जना आनीहरुलाई पठाएको अश्लिल सन्देशहरु समावेश गरिएको छ । ती सन्देशहरुमा आनीहरुसँग ‘बौद्ध धर्म अध्ययन’ को हिस्सा भन्दै यौनसम्बन्धको माग गरिएको छ ।
उक्त रिपोर्ट चिनियाँ सामाजिक सञ्जालमा बुधबार लिक भएको थियो । तर, पछि त्यसलाई सेन्सर गरिएको थियो ।
दस्तावेजमा पीडितहरुको बयान पनि राखिएको छ । दस्तावेजका अनुसार गत जुनमा बेइजिङस्थित प्रहरी कार्यालयमा एक पीडितले उजुरी समेत दर्ता गरेको उल्लेख गरिएको छ ।
आरोपसहितको दस्तावेज प्रस्तुत गर्ने दुई भिक्षुमध्ये एक सि सियाङ्कीले आफूहरु सरकारको अनुसन्धानको प्रतिक्षा गरिरहेको बताए ।
