चौतर्फी प्रहारपछि ओलीको प्रतिरक्षाका लागि यस्तो छ रणनीति, प्रतिरक्षा नगरेको भन्दै पार्टी नेतृत्वसँग भए क्रुद्ध
सरकारमाथि चौतर्फी आक्रमण भएको बताउँदै प्रधानमन्त्री केपी शर्मा ओली प्रतिरक्षा रणनीति बनाउने तयारीमा लागेका छन्। उनले यसको शुरुवात नेकपा निकट चिकित्सकहरूबाट शुरु गरेका छन्।
यही रणनीति बनाउन उनले आइतबार सत्तारुढ नेपाल कम्युनिस्ट पार्टी निकट चिकित्सकसँग छलफल गरे। डा गोविन्द केसीको अनशनलाई लिएर सरकारमाथि आक्रमण भएको विषयमा उनले छलफल गरेका हुन्। प्रधानमन्त्रीका प्रेस सल्लाहकार कुन्दन अर्यालले उक्त भेटको पुष्टी गरे।
केही दिनअघि बसेको पार्टी स्थायी समितिको बैठकमा अध्यक्ष ओलीले सरकारमाथि चौतर्फी आक्रमण हुँदा पनि पार्टीका नेताहरूले बचाउ नगरेको बताउँदै असन्तुष्टि पोखेका थिए। अर्का अध्यक्ष प्रचण्डले पनि सरकारको आलोचना जनस्तरबाट भएको भए पनि बचाउ गर्न निर्देशन दिएका थिए।
