राजपा संसदीय दलको नेतामा ठाकुर चयन, राजेन्द्र महतो यसरी भए फाएर
संसदको तेस्रो ठूलो दल राष्ट्रिय जनता पार्टीले संयोजक महन्थ ठाकुरलाई संसदीय दलका नेता चयन गरेको छ ।
शनिबार सिंहदरबारमा बसेको संसदीय दलको बैठकले ठाकुर सर्वसहमत नेता चयन भएका हुन् । नेतामा ठाकुरसहित अध्यक्ष मण्डलका अर्का नेता राजेन्द्र महतोले पनि दाबी गर्र्दै आएका थिए ।
दुई नेताको टकरावका कारण चुनाव सकिएको सात महिनापछि राजपाले दलको नेता चयन गरेको महासचिव केशव झाले जानकारी दिए । शनिबारको बैठकमा महतोले अडान छाडेपछि ठाकुर सर्वसहमत नेता चयन भएका हुन् ।
यसअघि शनिबार नेता चयनका लागि चुनाव हुने भनिए पनि मंगलबारसम्म सहमतिको कोसिस गर्ने नेताहरुले जनाएका थिए । तर, शनिबारकै बैठकमा महतोले अडान छाडेपछि ठाकुरको नाममा सर्वसहमति भएको हो ।
राजपाबाट प्रतिनिधिसभामा १७ र राष्ट्रियसभामा दुई जना सदस्य छन् ।
