लालबाबु बने यसरी बदनाम, रकम लिएर डीभी, पीआर वाला कर्मचारीलाई संरक्षण

 

संघीय मामिला तथा सामान्य प्रशासन मन्त्री लालबाबु पण्डित अघिल्लो कार्यकालमा निकै चर्चा बटुल्न सफल  मन्त्री हुन् । मन्त्री हुनुअघि खासै चर्चामा नरहेका लालबाबुले डीभी, पीआर वाला कर्मचारीप्रति कडा नीति लिएलगत्तै लो–प्रोफाइलका लालबाबुको प्रसिद्धि  एकाएक चुलिएको थियो ।

मन्त्री कै कारण मन्त्रालयमा भद्रगोल भएको छ । लालबाबुले
रकम लीएर डीभी, पीआर वाला कर्मचारीलाई संरक्षण दिन थालेका छन ।

केपी ओली नेतृत्वको सरकारमा पनि बढी जिम्मेवारी सहितको महत्वपूर्ण मन्त्रालय सम्हाल्ने मौका पाएका पण्डितले शुरुवाती दिनमा निकै कडा अभिव्यक्ति दिए । कर्मचारी वृत्त उनको अभिव्यक्तिले आक्रोसित बनेको भएपनि जनतामा भने लालबाबुले केही गर्ने आश थियो । धेरैको अनुमान थियो, लालबाबुले अघिल्लोपटक जसरी नै फलदायी काम गर्नेछन् ।

 

तर, अघिल्लो कार्यकालमा हाईहाई भएका यी सेलिब्रेटी मन्त्री पण्डितको हिजोआज खासै चर्चा छैन । ओली सरकारका अधिकांश मन्त्री यतिबेला के गर्दैछन् ? शीला जसरी खोज्नुपर्ने अवस्था छ । लालबाबु पनि गोल गर्न नसकेका अन्य लुइतामे मन्त्रीहरू जस्तै कतै रुमल्लिएका छन् ।

 

स्थानीय तहले अझै पाएनन् कर्मचारी 
देशका स्थानीय तहहरू कर्मचारी नपाएर प्रभावित भएको लामै समय गुज्रिसकेको छ । स्थानीय तहमा ५४ हजार कर्मचारी आवश्यक रहेको हिसाब सरकारले नै सार्वजनिक गरेको छ । आवश्यक कर्मचारीमध्ये केही कर्मचारी खटिएका भएपनि अधिकांश तहले कर्मचारी पाएका छैनन् ।
स्थानीय तहमा कर्मचारी अभावकै बीच लालबाबु मन्त्री भएपछि धेरैले यो समस्या हल हुने ठानेका थिए ।

 

स्थानीय तहका जनप्रतिनिधि आशावादी देखिएका थिए । स्वयं पण्डितले मन्त्री भएलगत्तै १ महिनाभित्र कर्मचारी पठाइसक्ने प्रतिबद्धता जनाएका थिए । तर मन्त्री बनेको १४१ दिनपछि पनि उनी कुनै अप्ठ्यारो नमानी जनतासंग गरेको पुरानो प्रतिबद्धता कुल्चिदै कर्मचारी पठाउने भाका सारिरहेका छन् । यसले स्थानीय तहको काम–कारबाही प्रभावित बनाएको त छ नै नेकपा र स्थानीय सरकारप्रतिको विकर्षण समेत बढाउँदै लगेको छ ।

 

 सरुवा भएकालाई उल्टै पुरस्कार 
गत असोजमा तत्कालीन सामान्य प्रशासन मन्त्री टेकबहादुर बस्नेतले स्थानीय तहमा १५ सय कर्मचारी सरुवा गरका थिए । तर तीमध्ये अधिकांश कर्मचारी कार्यक्षेत्र गएनन् । चर्को कर्मचारी अभावको स्थिति यथावत रहे पनि तीमध्येका अधिकांशले अझै पनि मन्त्रालयको यो निर्णयलाई चुनौती दिइरहेका छन् ।

 

सरकारले दिएको निर्देशन परिपालना नगर्ने कर्मचारी कारबाहीको भागिदार हुनेमा दुईमत छैन । लालबाबुले सामान्य प्रशासन मन्त्रालय सम्हालेपछि अटेरी कर्मचारी निशानामा पर्ने लख धेरैले काटेका थिए । विधि र प्रक्रिया कुल्चिने कर्मचारीलाई उनले तह लगाउने आम अपेक्षा यतिबेला निराशामा बदलिएको छ ।

 

लालबाबुमाथि राम्रो कामको अपेक्षा गर्नेहरूलाई उनले निराश त बनाएकै छन् तोकिएको ठाउँमा नगई बसेका कर्मचारीहरूको मनोबल समेत उच्च पार्ने काम गरेका छन् ।

उदेक र रहस्यको कुरा त के छ भने मन्त्री पण्डितले कारबाहीका भागिदार भएका कर्मचारीहरूलाई नै धमाधम पुरस्कृत गरिरहेका छन् । त्यस्ता कर्मचारीहरूलाई मन्त्रालयमा काज फिर्ता बोलाएर पण्डितले दण्डका भागिदार कर्मचारीलाई नै पुरस्कृत के काराणले गरे ? प्रश्न उठेको छ । कि मन्त्री लालबाबु पनि शुभलाभप्रति आकर्षित हुन थालेका हुन् ?

 

मन्त्रालय स्रोतका अनुसार, बरु मन्त्री लालबाबुले ठूलो संख्यामा स्थानीय तह जान आनाकानी गर्ने कर्मचारीहरूलाई मन्त्रालयमा फर्काएका छन् । उपसचिव प्रेम लुइँटेल यसका गतिलो उदाहरण हुन् ।

 

लुइँटेललाई तत्कालीन सामान्य प्रशासन मन्त्री टेकबहादुर बस्नेतका पालामा स्थानीय तहमा सरुवा गरिएको थियो । तर उनी अटेरी गरेर आफ्नो कार्यक्षेत्र गएनन् । मन्त्रालयको निर्देशन नमान्ने उनी कारबाहीको भागिदार हुने पर्ने हो । तर विधि, प्रक्रिया र ऐन कानूनको कुरा गर्ने तिनै मन्त्री लालबाबुले उनलाई पुरस्कृत गर्दै मन्त्रालय तानेका छन् । लालबाबु स्वयंबाट यस्तो काम भएपछि कर्मचारीहरू अचम्मित भएका छन् ।

 

स्रोतका अनुसार, विगतमा स्थानीय तहमा सरुवा भएकामध्ये केहीलाई धमाधम काज भन्दै तानिएको छ भने केहीलाई काठमाडौं वरिपरिका सुगम स्थानीय तहहरूमा काज सरुवा गर्न थालिएको छ । यसरी सरुवामा पर्नेमा मन्त्री र सचिवनिकट भएर चाकडी गर्ने कर्मचारी धेरै रहेको बताइन्छ ।

 

कतै पुर्पुरोमा हात, कतै खातैखात 
मन्त्रालय स्रोतका अनुसार, मन्त्री, सचिव तथा अन्य पहुँचवालाले आफूनिकटका कर्मचारीलाई काठमाडौं वरिपरि सरुवा गर्ने यतिबेला प्रतिष्पर्धा नै चलेको छ ।  यही होडबाजीले केही स्थानीय तहमा आवश्यकभन्दा कैयन गुणा कर्मचारी थुप्रिएको गनासो प्राप्त हुन थालेको छ ।

 

यसको ज्वलन्त उदाहरण ललितपुर जिल्लाको महालक्ष्मी नगरपालिका हो । यो नगरपालिकाको महिला समन्वय शाखामा नायव सुब्बा पदको १ दरबन्दी भएपनि यसमा अहिले १३ कर्मचारी हाजिर गर्दै टाप कस्दै(हाटा) जागिर खाइरहेको स्रोतको दावी छ । ‘कतै कर्मचारी अभाव भएको कुरा आइरहेको छ तर हाम्रो नगरपालिकामा भने एकै दरबन्दीमा पनि १३ जना हाजिर गरिरहेका छन्’, नगरपालिकाका एक कर्मचारीले नाम उल्लेख नगर्ने शर्तमा साँघुसंग भने ।

 

काठमाडौंको बूढानीलकण्ठ, तारकेश्वरलगायतका नगरपालिकाहरूमा पनि यसैगरी कर्मचारी पठाइएको स्रोत बताउँछ । मन्त्रालयले हचुवाका भरमा कर्मचारी पठाउन थालेपछि केही स्थानीय तहहरूले त पत्र नै लेखेर कर्मचारी नपठाउन मन्त्रालयसँग आग्रह गरेका छन् । ललितपुरको गोदावरी नगरपालिका त्यसमध्येको एक हो । उसले मन्त्रालयलाई पत्र लेख्दै कर्मचारी नपठाउन भनेको छ ।

 

आलम हाबी हुँदा सबैतिर भद्रगोल 
जानकारहरूका अनुसार, लालबाबु अन्य मन्त्रीहरूजस्तै कुहिरोको काग बन्नुको कारण उनका स्वकीय सचिव ओसिम आलममाथि दोष लगाइने गरिएको छ । उनले सरुवादेखि अनेक काममा सौदाबाजी गर्ने र शुभलाभ हात पार्ने अनैतिक काम गर्दै आएको आरोप छ ।

 

उनकै कारण २०७४ असोजमा स्थानीय तहमा भएको कर्मचारी सरुवा पनि कार्यान्वयन हुन नसकेको चर्चा मन्त्रालयतिर छ । ‘आलमले मन्त्रालयमा बसेर निकै गलत काम गरेका छन्,’ मन्त्रालयका एक उच्च अधिकारीले भने, ‘आलमको कार्यशैलीकै कारण मन्त्रीको पपुलारिटी खस्किरहेको छ ।

 

अन्ततः आलम बर्खास्त 

मन्त्री पण्डितका स्वकीय सचिव आलममाथि मन्त्रीको नाउँमा धन्दा चलाएको भन्दै आलोचना भएपछि अन्ततः उनी बर्खास्तमा परेका छन् । मन्त्रीले केही दिनअघि उनलाई हटाएको मन्त्रालय स्रोतले साँघुलाई जानकारी दियो ।

 

आलमले लामो समयदेखि पण्डितलाई साथ दिंदै आएका थिए । अघिल्लोपटक मन्त्री हुँदा पनि उनै आलम पण्डितका स्वकीय सचिव थिए । तर अघिल्लो कार्यकालमा आलम खासै विवादमा तानिएका थिएनन् । यसपटक भने उनी शुरुदेखि नै विवादमा फसेका थिए । अन्ततः पण्डितले लामो समयदेखि साथ दिंदै आएका भए पनि उनलाई हटाउने निर्णय गरेका छन् ।

 

मन्त्रीले आलमलाई हटाए पनि उनले अहिलेसम्म उक्त स्थानमा कसैलाई पनि नियुक्त नगरेको बताइन्छ । पण्डितले स्वकीय सचिवका लागि योग्यतम व्यक्ति खोजिरहेको चर्चा मन्त्रालयतिर छ । आलमसंग यसबारे कुराकानी गर्न साँघुले सम्पर्कको प्रयास गर्दा सफल हुन सकेन । साँघु साप्ताहिकबाट

प्रकाशित मिति : २९ असार २०७५, शुक्रबार  १६ : ३१  बजे