सरकारविरुद्ध कडा आन्दोलन गर्ने कांग्रेसको घोषणा, यस्तो छ तयारी
प्रमुख प्रतिपक्षी नेपाली कांग्रेसले सरकारले दुई तिहाइ बहुमतको दम्भ राखेर निर्णयहरू गरिरहेको आरोप लगाएको छ।
उनले तीन तहका चुनाव सम्पन्न भइसकेर देशमा राजनीतिक स्थायित्व भइरहेका बेला सरकारले जबर्ज्स्ति द्वन्द्व बढाउन खोजेको आरोप लगाए ।
पार्टी केन्द्रीय कार्यालय सानेपामा बिहीबार दिउँसो आयोजित पत्रकार सम्मेलन बोल्दै कांग्रेस प्रवक्ता विश्वप्रकाश शर्माले बुधबार राति मन्त्रिपरिषद् बैठकले अघिल्लो सरकारका राजनीतिक नियुक्ति खारेज गर्ने निर्णयको त्यही दम्भका आधारमा भएको भन्दै त्यसको विरोधमा उत्रने बताए।
उनले अरू राजनीतिक नियुक्ति र प्रदेश प्रमुख नियुक्ति फरक भएको उल्लेख गर्दै प्रदेश प्रमुख हटाइए आन्दोलनसँग कानुनी उपचार पनि खोजिने बताए।
उनले भने,‘सामान्य बहुमतले नभएर उहाँहरूले दुई तिहाइ पुर्याउनु भयो। अहिले दुई तिहाइको दम्भको श्रीपेच लगाउँदै हुनुहुन्छ, दम्भको श्रीपेच लगाएर लोकतन्त्रको रक्षा हुँदैन।’ उनले सरकारी निर्णयको सडक, सदन, सञ्चारमाध्यम, सामाजिक सञ्जाल र सत्याग्रहमार्फत विरोध गर्ने बताए।
