काठमाडौंमा बम बनाउँदै गरेका विप्लवको ४० नेता–कार्यकर्ता पक्राउ, ७ जनाविरुद्ध सार्वजनिक मुद्दा
काठमाडौं प्रहरी परिसरले विप्लव समूहका ४० जना नेता तथा कार्यकर्तालाई पक्राउ गरेको छ ।
काठमाडौंको नेपालटारमा बम बनाउँदै गरेको अबस्थामा विप्लवको ४० नेता–कार्यकर्ता पक्राउ परेका छन । ७ जना विरुद्ध सार्वजनिक मुद्दा चलाईएको प्रहरीले जनाएको छ ।
उनीहरुलाई नेपालटारमा संदिग्ध गतिविधि गरिरहेको अवस्थामा पक्राउ गरिएको प्रहरीले जनाएको हो ।
काठमाडौं प्रहरी प्रमुख वरिष्ठ उपरीक्षक (एसएसपी) विश्वराज पोखरलका अनुसार पक्राउ परेका मध्ये ७ जनाविरुद्ध सार्वजनिक अपराध मुद्दा चलाइएको छ ।
पोखरेलका अनुसार विलप्व समूहका सदस्य एवं पूर्वमन्त्री पदम राई, समूहका पोलिटब्यूरो सदस्य भरत बम, केन्द्रीय सदस्य रणसिंह पुन मगर, कानुनी सल्लाहकार ओमप्रकाश पाण्डे, काठमाडौं सेक्रेटरी धिरेन्द्र उपाध्याय, एकाराज राई र सिद्धान्त राईविरुद्ध मुद्दा चलाइएको हो ।
उपाध्यायमाथि यसअघि ललितपुरस्थित अयोधिप्रसाद यादवको घरमा बम पड्काएको समेत आरोप छ ।
‘जनतामा भय र त्रास सिर्जना गर्ने गतिविधिमा आइन्दा संलग्न हुने वाचापछि अन्यलाई छाडिएको हो’, एसएसपी पोखरेलले भने । पछिल्लो समय काठमाडौं प्रहरी शान्ति, सुरक्षा कायम गर्ने विषयमा आक्रमक रुपमा प्रस्तुत हुँदै आएको छ ।
प्रकाशित मिति : १८ असार २०७५, सोमबार १३ : १९ बजे
