परीक्षा बोर्डको चरम लापरवाही, नतिजा बी मा झारिदिएपछि सलिनाले गरीन आत्महत्या, मृत्यु भइसकेपछि ३.७५ जीपीए आयो

 

 

इटहरी- एसईईमा ‘ए-प्लस’को नतिजालाई राष्ट्रिय परीक्षा बाेर्डले ‘बी ग्रेड’मा झारिदिएपछि झापाकी एक छात्रा मृत्यु रोज्न विवश भएकी छन् ।

बोर्डको चरम लापरवाही उनको मृत्युको कारण बनेको छ । बुद्धशान्ति गाउँपालिकाकी सलिना ढकालले बिर्तामोडस्थित वाल्मिकी एजुकेसन फाउन्डेसनबाट एसईई दिएकी थिइन् ।

९ असारमा आएको एसईईको परीक्षाफल भोलिपल्ट प्राविधिक कारण बताउँदै परिवर्तन गरिएको थियो । त्यसबाट करिब नौ हजार परीक्षार्थीको नतिजामा फेरबदल भएको थियो, जसलाई शिक्षा क्षेत्रका विज्ञहरूले गम्भीर गल्ती बताएका थिए । बोर्डको लापरवाहीका कारण करिब पाँच लाख विद्यार्थी र १० लाख अभिभावकलाई तनावमा पारेको थियो ।

पहिलो दिनको परीक्षाफलमा ढकालको प्राप्तांक जीपीए २.८० थियो । कम अंक आएकाले तनावमा परेकी ढकालले आफ्नी एक साथीसहित विष सेवन गरेकी थिइन् ।

एसईईको परीक्षाफल प्रकाशित हुँदा उनी बिर्तामोडकी साथी प्रकृति बिष्टसँग धनकुटाको भेडेटार घुम्न गएकी थिइन् । त्यहीं दुवैले मुसा मार्ने विष खाएका थिए ।

इलाका प्रहरी धरानका डीएसपी रामेश्वर पौडेलका अनुसार बेहोस अवस्थामा उनीहरूलाई बीपी कोइराला स्वास्थ्य विज्ञान प्रतिष्ठान पुर्‍याइएको थियो । उपचारकै क्रममा चिकित्सकले ढकाललाई मृत घोषित गरेका थिए ।

उपचारपछि उनकी साथी बिष्ट भने घर फर्किसकेकी छन् । ढकाल र बिष्ट दुवै विराटनगर बसेर ब्रिजकोर्स गरिरहेका थिए ।

धनकुटाका प्रहरी प्रमुख एसपी सुरेन्द्रबहादुर गुरुङले यसबारेमा आफूलाई कुनै सूचना नआएको बताए । झापा काँकडभिट्टास्थित इलाका प्रहरीका निरीक्षक खगेन्द्र ढकालका अनुसार बिष्टको पनि मानसिक अवस्था कमजोर बनेको छ । चिकित्सकले कसैलाई उनीसँग कुरा गर्न नदिन निर्देशन दिएका छन् ।

‘होस्टेल र एसईईको लापरवाहीले छोरीको ज्यान गयो’

ढकालको मृत्युपछि साथीहरूले उनको फेसबुल वालमा एसईईको नतिजाका कारण उनले आत्महत्या गरेको लेखेपछि मात्र त्यसबारे जानकारी सार्वजनिक भएको हो ।

उनको शुरुको परीक्षाफलमा जीपीए २.८० देखिएको थियो । उनको मृत्यु भइसकेपछि सुधारिएको परीक्षाफलमा जीपीए ३.७५ (ग्रेड ए-प्लस) आएको छ ।

अध्ययनशील छोरीको मृत्यु भएपछि शोकमा रहेका बुवा तारानाथ ढकालले विराटनगरको एक होस्टेल र राष्ट्रिय परीक्षा बोर्डको चरम लापरवाहीका कारण छोरीको ज्यान गएको बताए । ‘उनको ज्यान जानुमा एसईईमा कमजोर अंक आउनु नै हो,’ ढकालले फोनमा भने ।

राष्ट्रिय परीक्षा बोर्डसँगै विराटनगरको लर्ड बुद्ध होस्टेलको लापरवाहीका कारण छोरीको ज्यान गएको ढकालले बताए । आफूहरूलाई नसोधी होस्टेलबाट भेडेटार जान दिइएको ढकालको गुनासो छ । उनले भने, ‘होस्टेलबाट लामो यात्रामा जाँदा परिवारलाइ खबर गर्नुपर्ने गरिएन ।’

ढकालको आत्महत्याबारे नेपाल समयको जिज्ञासामा परीक्षा नियन्त्रक अम्बिकाप्रसाद रेग्मीले यो कुरा उडन्ते भएको बताउँदै गैरजिम्मेवार जवाफ दिए ।