नेपालमा दाउदको कनेक्सन स् जुवादेखि सुनसम्म, नेपाल अन्तराष्ट्रिय अपराधीको खेलमैदान बन्दै

ठूला अपराधीलाई नेता र प्रहरीको संरक्षणका कारण नेपालमा अन्तराष्ट्रिय संगठन अपराध मौलाउँदै गएको छ । अन्तराष्ट्रिय अपराधीहरुले नेपाललाई अपराधको ‘ट्रान्जिट प्वाइन्ट’का रुपमा प्रयोग गर्दै आएका छन् । कुख्यात अपराधी दाउद इब्राहिमको समूहले पनि नेपालमा आफ्नो अपराधिक गतिविधि बढाउँदै लगेको छ ।

नेपालमा हुने जुवादेखि सुन र हुन्डीको कारोबारमा सो समूहको संलग्नता देखिएको उच्च सुरक्षा अधिकारीहरु बताउँछन् । तर, सो गिरोहसँग निकट व्यक्तिहरुको राजनीतिक तहमै बलियो सम्बन्ध रहेकाले अहिलेसम्म कोही पनि कारबाहीमा परेका छैनन् ।

गत आइतबार महानगरीय अपराध महाशाखाले सो समूहका एक सदस्य नागराज भन्ने नथमल अग्रवाललाई पक्राउ गर्यो ।

विगत लामो समयदेखि उनी नेपालमा हुने सट्टेबाजी धन्दाका नाइकेका रुपमा चिनिदै आएका थिए । तर, प्रहरीले उनलाई पक्राउ गर्न सकेको थिएन ।

किनकी उनले प्रहरी लगायत सबैतिर आफ्नो सेटिङ मिलाएका थिए । दाउदको समूहसँग मिलेर उनले नेपालमा सट्टेबाजीको धन्दा चलाउँदै आएको प्रहरी अधिकारीहरु बताउँछन् । खासगरी क्रिकेटका खेलहरुमा उनले यस्तो काम गर्दै आएका छन् ।

नेपालको रहेका धेरै मारवाडी व्यवसायीहरु क्रिकेटका फ्यान हुने भएकाले उनीहरुलाई नै लक्षित गरी अग्रवाल बाजी लगाउने काम गर्दै आएका थिए । गत महिना सम्पन्न इन्डियन प्रिमियर लिग (आइपिएल)मा उनले करोडौं पैसा उठाएका थिए । जसमध्ये राजेश सिंह लगायत ६ जना व्यक्तिसँग मात्र उनले २ करोड ४० लाख रुपैयाँ उठाएका थिए । उनीहरुले बाजी जिते तर अग्रवालले उनीहरुलाई पैसा दिएनन् । तिनै पीडितहरुले प्रहरीमा उजुरी गरेपछि अग्रवाल पक्राउ परेका हुन् ।

उनी गोवामा क्यासिनोमा जुवा खेलाउने व्यक्ति हुन् । टेबल किनेर उनले जुवा खेलाउने गर्दथे । जसमा पनि अन्र्डरवल्र्ड माफियासँग उनको सम्बन्ध रहेको स्रोत बताउँछ ।

२ वर्षअघि प्रहरीले उनका भाईको गिरोहमा आबद्ध २ जनालाई न्यूरोडमा पक्राउ गरेको थियो । त्यतीबेला पनि उनले प्रहरीमा सेटिङ मिलाएर आफुलाई जोगाएका थिए ।

उनीसँगै मिलेर विगतमा सट्टेबाजको धन्दा चलाउने गौरव तिवारीको समूहलाई पनि प्रहरीले गत महिना पक्राउ ग¥यो । पछि विवाद भएपछि तिवारीले सिधैं आफैं नेपाल एजेन्ट भएर काम सुरु गरेका थिए । उनले पनि अन्तराष्ट्रिय माफिया समूहसँगै मिलेर काम गर्दै आएका छन् ।अग्रवालको भन्दा प्रहरीमा उनको सेटिङ राम्रो छ । सोही कारण पक्राउ परेको ६ दिनमै उनी २ सय रुपैयाँ धरौटीमा छुटे । अहिले काठमाडौंका सबै प्रहरीका हाकिमहरुलाई मिलाएर उनले विश्वकपमा बाजीको धन्दा चलाइरहेका छन् ।

नेपालमा अन्तराष्ट्रिय माफियाहरुको चलखेल नयाँ विषय होइन । २५ वर्षदेखि नै नेपालमा अन्तराष्ट्रिय गिरोहहरु सक्रिय छन् । दाउद इब्रामिक र छोरा राजन समूहको टक्करबाट नेपालमा मन्त्री समेत भएका मिर्जा दिलसाग बेगको हत्या भएको थियो । २०५५ साल असार १५ गते उनको हत्या भएको थियो ।

दाउदसँग मिलेर नेपालमा धन्दा गरेको आरोपमा उनको हत्या राजन समूहले गोली हानी हत्या गरेको थियो ।त्यसपछि कमल नेपाली, जमिम शाह लगायत व्यक्तिहरु पनि अन्तराष्ट्रिय माफिया समुहकै टक्करका कारण मारिएको बताइन्छ ।

सुन तस्करीमा दाउदको कनेक्सन खोजिदै

यतिबेला सुन तस्करीको अनुसन्धानमा बिशेष अनुसन्धान टोली गठन गरिएको छ । जसले ४० भन्दा धेरै व्यक्तिहरुलाई पक्राउ गरिसकेको छ । जसमध्ये केही हाइप्रोफाइल व्यक्तिहरु समेत छन् ।

सो गिरोहले करिब १७ अर्ब रुपैयाँ बराबरको ३८ सय केजी सुन विमानस्थलबाटै तस्करी गरेको थियो । जसमध्ये धेरै सुन भारत लगिएको थियो ।

अनुसन्धान टोलीले पछिल्लो समय गिरोहका नाइकेहरुमाथि छानबिन गरिरहेको छ । जसमा ४ जना व्यापारीहरु पक्राउ परेका छन् ।

ठूला व्यापारीक घरानियाहरुसँग मिलेर नेपालमा व्यापार गर्दै आएका विमल पोदार, अकबर शाह, इम्तियास अली र प्रभात अग्रवालमाथि समितिले छानबिन गरिरहेको छ ।

पक्राउ परेका चारै जना अन्तराष्ट्रिय माफिया गिरोसँग सम्बन्ध भएको आरोपित व्यक्ति हुन् । उनीहरुमध्ये केहीको दाउदका निकट व्यक्तिहरुसँग हिमचिम रहेको स्रोत बताउँछ । गिरोहका मुख्य पात्र चुडामणि उप्रेती ‘गोरे’ ले तस्करीमा दाउदको समेत संलग्नता रहेको सूचना यसअघि नै प्रहरीलाई दिइसकेका छन् । कलकात्तामा बसेर सुन ‘रिसिभ’ गर्ने दुई व्यापारीहरु दाउद समूहका व्यक्ति भएको उप्रेतीको भनाई छ ।

‘गोरेले भनेअनुसार तस्करीमा दाउदको सम्बन्ध खुल्दै गएको छ,’ अनुसन्धान टोलीका एक अधिकारी भन्छन्,‘दुबइमा रहेका केही व्यक्तिहरु समेत दाउदसँग निकट छन् ।

’ दुबईलाई दाउदको अखडा मानिन्छ । जहाँबाट उनले तस्करी तथा हुन्डीको साम्राज्य चलाउँदै आएका छन् । नेपालमा तस्करी भएको सुन दुबईबाट नै आएको थियो ।

राजनीतिक प्रभाव बिना अनुसन्धान टोलीले काम गरेमा नेपालमा दाउदको कनेक्सनका धेरै कुराहरु खुल्ने छन् । स्रोतका अनुसार कालो धनलाई सेतो बनाउन सो गिरोहको पैसा समेत नेपालमा लगानी गरिएको छ ।

केही रेस्टुरेन्ट,मेडिकल कलेज उद्योगहरुमा लगानी गरिएको छ । केही चर्चित व्यापारीहरुले त्यसरी नेपालमा लगानी गरिरहेका छन् । त्यस्ता समूहले अन्य व्यक्तिको नाममा घर जग्गा समेत जोडेका छन् । राजधानीका केही अपार्टमेन्टमा त्यस्तै समूहको लगानी छ ।

नेपालमा दैनिक करोडौंको हुन्डीको कारोबार भइरहेको छ । यसमा पनि अन्तराष्ट्रिय गिरोह संलग्न छ ।  विगतमा गठन भएका विभिन्न छानबिन समितिहरुले समेत अन्तराष्ट्रिय गिरोहको नेपालमा बढेको चलखेल नियन्त्रण गर्न सरकारलाई सुझाव दिएको थियो । तर, त्यो कार्यान्वायन भएन । जसकारण उनीहरु थप शक्तिशाली हुँदै गएका छन् ।

हुन्डी, सुन तथा अवैध जुवा खेलाउने गिरोहका नाइकेहरुको प्रहरीका हाकिम तथा नेताहरुसँग राम्रो सम्बन्ध छ । त्यसकारण विगतमा पटक पटक सुन तस्करीमा ठूला व्यक्तिहरु जोडिए पनि त्यसउपर गम्भीर छानबिन हुँदैन थियो ।

हुन्डीका ठूला कारोबारीहरु अहिले पनि पक्राउ परेका छैनन्। नेता, प्रहरी र कर्मचारीको मुख्य आर्थिक स्रोत नै यस्ता व्यापारीहरु हुन् ।

बिशेष अनुसन्धान टोलीले देशलाई नै खोक्रो बनाउने गरी भइरहेको यस्तो संगठित अपराधको अनुसन्धान गर्ने सम्भावना छ । तर, ठूला मान्छेहरु जोडिन थालेपछि समितिलाई पनि कमजोर बनाउन चलखेल सुरु भइसकेको छ ।

त्यस्तो समितिभित्रकै केही व्यक्तिहरु चलखेलमा लागेपछि अन्तराष्ट्रिय माफिया गिरोहका नेपाल एजेन्टहरु यसपटक पनि कानुनी दायरामा आउने सम्भावना कम छ । जसले नेपालमा अन्तराष्ट्रिय अपराधीहरुको खेलमैदान बन्ने जोखिम बढ्दै गएको छ । दृष्टि साप्ताहिक