मीनेन्द्र रिजालले यसरी हाने ओलीलाई वाण, राजा गए महाराजा आए
काठमाडौं-संघीय संसद अन्तर्गत मंगलबारको प्रतिनिधिसभा बैठकमा नेपाली कांग्रेसका नेता तथा सांसद डा मीनेन्द्र रिजालले सरकारले गरेको कामको तीब्र आलोचना गरेका छन् ।
सरकार र मन्त्रीले गरेका काम प्रति तिब्र असन्तुष्टि जनाउँदै नेता रिजालले मन्त्रीहरु छाडा भएको आरोप लगाए । सम्बोधनका क्रममा सांसद रिजालले भने, ‘प्रधानमन्त्री ज्यू आफ्ना मन्त्रीहरुलाई छाडा नछोड्नु नियन्त्रणमा राख्नुस् ।’ उनले प्रतिपक्षी दललाई सरकारले धेरै सिकाएको बताउँदै आफ्नै नेतृत्वको मन्त्रिपरिषदलाई पनि सिकाए लगाम लगाउन सुझाव दिए ।
‘सरकारका मन्त्रीहरुमध्ये एकले तस्करलाई थुन्छु भन्नुहुन्छ, अर्कोले चलाउन पाइँदैन भन्नुहुन्छ । यस्तो अवस्था जारी रहँदा देश कहिले बन्छ,’ डा रिजालले प्रश्न गरे ।
भैपरी बजेट किन
उनले राष्ट्रपति कार्यालय तथा प्रधानमन्त्री कार्यालयका लागि छुट्याइएको भैपरी शीर्षकको बजेटका विषयमा पनि प्रश्न उठाए । उनले भने, ‘राष्ट्रपति कार्यालयका लागि सबै शीर्षकमा बजेट छुट्याइएको छ । त्यसपछि फेरि भैपरी शीर्षकमा अर्को बजेट किन चाहियो ।’
त्यस्तै प्रधानमन्त्री कार्यालयको १४ करोड बजेट भैपरी शीर्षकमा छुट्याएको विषयमा आपत्ति जनाए । उनले यति धेरै बजेट यो शीर्षकमा किन भन्दै प्रश्न गरे । नेता रिजालले मन्त्री तथा प्रधानमन्त्रीको सवारीका क्रममा हुने जाम तथा प्लेन होल्डिङको समय धेरै रहेको भन्दै व्यवस्थापन गर्न सुझाव दिए ।
