ललितपुरमा तीन घर जलेर ध्वस्त,३० लाख बढीको क्षति

ललिपुर मंगलबजारको तीनवटा घरमा आगलागी भएको छ । शुक्रबार बिहान स्थानीय नरहरिप्रासद लाखेको घरबाट सुरु भएको आगोका कारण सानुप्रासद लाखे र गीताप्रसाद लागेको घरमा पनि क्षति भएको छ ।

पहिला एउटै रहेको घर जादुभाइ छुट्टिने बेला तीनवटा बनाइएको थियो । विद्युत सर्ट भएर आगलागी भएको लगनखेल प्रहरीले जनाएको छ ।

बिहान साढे ८ बजे लागेको आगो ललिपुर, भक्तपुर तथा काठमाडौँबाट गएका दमकल, स्थानीय बासिन्दा र प्रहरीको सहयोगमा झण्डै दुई घण्टापछि नियन्त्रणमा आएको मंगलबजार ट्राफिक प्रहरी चौकीका प्रहरी सहायक निरीक्षक सरोज प्रजापतिले जानकारी दिएका छन् ।

आगलागीबाट घर पूर्णरुपमा क्षतिग्रस्त भएको छ भने घरमा रहेका सामान पनि जलेका छन् । यसबाट ३० लाख भन्दा बढीको नोक्सानी भएको अनुमान छ । मानवीय क्षति भने नभएको प्रहरीले जनाएको छ ।