नेपाली काँग्रेस, फोरम, राजपा, र राप्रपाले सरकारको नीति तथा कार्यक्रममा ६ वटा संशोधन प्रस्ताव पेश
सरकारको नीति तथा कार्यक्रममा ६ वटा संशोधन प्रस्ताव पेश गरिएको छ । बुधबार प्रतिनिधिसभाको बैठकमा सरकारको नीति तथा कार्यक्रममाथिको छलफलमा भाग लिँदै प्रमुख प्रतिपक्ष दल नेपाली काँग्रेस, संघीय समाजवादी फोरम, नेपाल र राष्ट्रिय जनता पार्टी, नेपालका सांसदहरुले ६ वटा संशोधन प्रस्ताव पेश गरेका हुन् ।
नेपाली काँग्रेसका १७ जना सांसदहरुको तर्फबाट नेता डा. मिनेन्द्र रिजालले पेश गरेको संशोधन प्रस्तावमा नीति तथा कार्यक्रम पेश गर्दा राष्ट्रपति विद्या भण्डारीले प्रतिनिधिसभाका सभामुख र राष्ट्रियसभाका अध्यक्षलाई सम्बोधन गर्दा अपमानजनक पदावली प्रयोग गरेको भन्दै त्यसमा संशोधन गर्न माग गरिएको छ ।
नेता रिजालले ठूलो बलिदानीपूर्ण संघर्षबाट प्राप्त संसदको सभामुख र राष्ट्रिय सभाका अध्यक्ष जस्तो सम्मानित पदलाई अपमान हुने गरी राष्ट्रपतिले सम्बोधन गरेको भन्दै आपत्ति जनाए । उनले संसदको मर्यादामाथि नै आँच आउने गरी राष्ट्रपतिबाट भएको सम्बोधनलाई सामान्य त्रुटिको रुपमा नलिन पनि सरकारको गम्भिर ध्यानाकर्षण गराए ।
संघीय समाजवादी फोरम, नेपालका सांसदहरु प्रदिप यादव, रामसहाय प्रसाद यादव, सुरेन्द्रकुमार यादव र रेणुका गुरुङ तथा राष्ट्रिय जनता पार्टी, नेपालका सांसद अनिल झाले संविधान संशोधन गर्नुपर्ने मुख्य बूँदा नीति तथा कार्यक्रममा थप गर्न माग गर्दै संशोधन प्रस्ताव पेश गरे ।
संघीय समाजवादी फोरम, नेपालका सांसद प्रदीप यादवले सरकारले ल्याएको नीति तथा कार्यक्रमले सहिदहरुको अपमान समेत गरेको भन्दै असन्तुष्टि व्यक्त गरे ।
राष्ट्रिय जनता पार्टी, नेपालका सांसद अनिल झाले मुुलुकलाई शान्ति र समृद्धिको बाटोमा अघि बढाउन पनि संविधान संशोधन गरेर अघि बढनुको विकल्प नरहेकाले सरकारको नीति तथा कार्यक्रममा सो बुदा थप गर्न संशोधन प्रस्ताव पेश गर्र्नु परेको स्पष्ट पारे ।
सांसद यादवले ‘सुःखी नेपाली र समृद्ध नेपाल’ बनाउन पनि सरकारले आफ्नो नीति तथा कार्यक्रममा मधेशी जनताको माग अनुसार संविधान संशोधन गर्नेछु भन्ने प्रतिवद्धतासहितको बूदा थप गर्नुपर्ने तर्क गरे ।
