काग्रेसलाइ सधै सुताउने गरी अरु वाम पनि यसरी मिल्ने भए
प्रमुख दुई कम्युनिष्ट पार्टी नेकपा एमाले र माओवादी केन्द्र मिलेर नेपाल कम्युनिष्ट पार्टी गठनको केही समयमै संसद बाहिरका चार साना कम्युनिष्ट पार्टीले एकताको गृहकार्य थालेका छन् ।
मोहन वैद्य नेतृत्वको नेकपा क्रान्तिकारी माओवादी, नेत्रविक्रम चन्द नेतृत्वको नेपाल कम्युनिष्ट पार्टी, मोहन विक्रम सिंह नेतृत्वको नेकपा मसाल र ऋषि कट्टेल नेतृत्वको नेकपाले एकताको तयारी गरेका हुन् ।
निर्वाचन आयोगमा यसअघि नै दर्ता भएको नेकपाका अध्यक्ष कट्टेलले पार्टी एकताका लागि गृहकार्य भइरहेको जानकारी दिए । ‘एकताको विषयमा हामीले धेरै चरणमा छलफल गरिसकेका छौं, छिट्टै मूर्त रुप पाउँछ’ उनले भने । विप्लवविरुद्ध सरकारी वारेण्टका कारण बैठक बस्न ढिलाइ भएको एक नेताले बताए ।
एमाले र माओवादी मिलेर बनेको नेकपा नाम मात्रको कम्युनिष्ट भएकोले सशक्त कम्युनिष्ट पार्टी बनाउने उनीहरुले दावी गरे । ‘नाम कम्युनिष्ट पार्टी राखेपनि उनीहरु (एमाले माओवादी मिलेर बनेको पार्टी) को चरित्र कम्युनिष्ट जस्तौ छैन’ कट्टेलले भने, ‘हामी नाम मात्र होइन काम पनि कम्युनिष्टले जस्तै गछौ ।’
विप्लव, वैद्य र मोहनविक्रम सिंहले राष्ट्रियताको मुद्धामा आन्दोलन गर्ने भन्दै गत वर्षको पौष ५ गते संयुक्त विज्ञप्ति जारी गरेका थिए । विप्लव नेतृत्वको नेकपासँग सीपी मैनाली नेतृत्वको मालेले पनि एकता गर्ने चर्चा चलेको थियो ।
हामी बहसमै छौ : मोहन विक्रम
मसालका महामन्त्री मोहन विक्रम सिंहले भने मोहन वैद्य लगायतसंग पार्टी एकता गर्ने नगर्ने भन्ने विषयमा आफूहरुले बहस शुरु गरेको बताए ।
‘पार्टी एकताको तयारी होइन उहाँहरुसँग बहस गरेका छौं, के समानता छन् र के अन्तर छन् भन्ने कुरा छलफल गछौं’ नेता सिंहले भने, ‘सैद्धान्तिक प्रश्नमा सहमत भयो भने एकतासम्म पुग्न सकिन्छ ।’
मोहन विक्रमले एमाले माओवादी एकतालाई सकारात्मक रुपमा लिएको बताए । ‘यसलाई कम्युनिष्ट एकता भन्न मिल्दैन, किनभने उहाँहरु मार्क्सवादबाट धेरै बिचलित भइसक्नु भएको छ’ उनले भने, ‘तैपनि देशको राजनीतिक स्थायित्वका लागि दुई दलको एकता महत्वपूर्ण हुन्छ ।’
