ओली सरकारका चल्तापूर्जा मन्त्री मातृका यादवलाई उपचारको लागि आज थाइल्याण्ड लगिँदै
टाउको र कम्मरमा समस्या आएर उपचार गराइरहेका नेकपाका नेता तथा उद्योग वाणिज्य तथा आपूर्तिमन्त्री मातृका यादव थप उपचारका लागि आज थाइल्याण्ड जाँदैछन् । आइतबार आज दिउँसो १ बजे उपचारका लागि यादव थाइल्याण्ड जाँदैछन् ।
यसअघि उनको उपचार काठमाडौंको नर्भिक अस्पतालमा हुँदै आएको थियो । उनलाई आइतबार दिउँसो साढे एक बजेको उडानबाट थाइल्याण्ड लगिँदैछ ।
अखिल क्रान्तिकारीका उपाध्यक्षसमेत रहेका मातृका यादवका छोरा रविकिरणका अनुसार उनमा टाउको र कम्मरको समस्या छ । पछाडितिर टाउको अति नै दुख्न थालेपछि मातृकालाई अस्पताल भर्ना गरिएको थियो । नर्भिकमा उनलाई डाक्टरहरु पंकज जलन, जीपी जयसवाल लगायतले हेरेका थिए ।
‘एकपटक थाइल्याण्ड गएर देखाउने सल्लाह डाक्टरहरुले दिनुभयो । त्यही भएर थाइल्याण्डको बुम्रुङमा उपचार गर्न लैजान लागिएको हो,’ रविकिरणले भने ।
मातृकाको साथमा नेपालबाट उनकी श्रीमती थाइल्याण्ड जानेछिन् भने उता दूतावासका कर्मचारीहरुले सघाउने छन् ।
