पेरिसडाँडाको कार्यालयमा ओली प्रचण्डलाई एउटै टेबल, यस्तो देखियो चहलपहल
नवगठित नेपाल कम्युनिस्ट पार्टीका अध्यक्षद्वय केपी शर्मा ओली र पुष्पकमल दाहाल प्रचण्ड यसअघि माओवादीको केन्द्रीय कार्यालय रहेको कोटेश्वर पेरिसडाँडा पुगेका छन् । शुक्रवार साढे ५ बजे पेरिसडाँडा पुग्दा पूर्व माओवादीका कार्यकर्ताले उनीहरूलाई भव्य स्वागत गरेका थिए ।
ओली र प्रचण्डसँगै महासचिव विष्णु पौडेल र सचिवालयका नेताहरू कोटेश्ववर पुगेका हुन् । प्रचण्ड र ओलीलाई एउटै टेवलमा दुईवटा कुर्सीको व्यवस्था गरिएको थियो ।
नेकपा एमाले र माओवादी केन्द्रबीच बिहीवार पार्टी एकता भएको थियो । एकताको भोलिपल्ट ओली र प्रचण्डले दुवै कार्यालयमा गएर पदभार ग्रहण गरेका हुन् ।
अपराह्न धुम्बाराहीस्थित तत्कालीन एमालेको केन्द्रीय कार्यालयमा गएर पदभार सम्हालेपछि अध्यक्षद्वयसहित सचिवालय सदस्यहरु पेरिसडाँडा पुगेका थिए । पेरिसडाँडामा दुवै नेताले शहीदको शालिकमा माल्यार्पण समेत गरेका थिए ।
त्यस्तै शुक्रबार नै नेपाल कम्युनिष्ट पार्टीका अध्यक्ष पुष्पकमल दाहालसहितको टोली धुम्बाराहीस्थित कार्यालयमा पुगेको थियो । उक्त कार्यालयमा कम्युनिष्ट पार्टीका अर्का अध्यक्ष केपी शर्मा ओलीसहितको टोलीले प्रचण्डलाई स्वागत गरेको थियो । त्यहाँ कम्युनिष्ट पार्टीका अध्यक्षद्वय र सचिवालय सदस्यले सामूहिक तस्वीर खिचाएका थिए ।
प्रकाशित मिति : ४ जेष्ठ २०७५, शुक्रबार १८ : ४९ बजे
