गोरेको पैसामा करोडौंको बंगला बनाए यी दुई सईले, किन छाडीए सई गजेन्द्र रावल

। ३३ किलो सुन प्रकरणमा गृहमन्त्रालयका सहसचिव इश्वर पौडेल संयोजकत्वको छानबिन समितिले बयानमा बोलाएकामध्ये सई गजेन्द्र रावलविरुद्ध भने बलियो प्रमाण नभेटिएको भन्दै प्रतिवादी नबनाई छाडिएको छ । जबकि ३३ किलो सुनमा सईहरु सन्जेल र रावलले सुन तस्कर चुडामणि उप्रेती गोरेको योजना अनुसार काम गरेका थिए ।३३ किलो सुन प्रकरणमा गोरेकै योजनामा सनम शाक्यको लास व्यवस्थापन गर्ने काम रावलले नै गरेका थिए । गोरेको निकट सम्पर्कमा रहेका सई रावलले बालाजुमा ३ करोड पर्ने घर बनाएका छन् । जुन गोरेको सुन तस्करीको पैसाबाट बनाएको आरोप छ ।

रावललाई मुद्दा नचलाऊन छानविन समितिका डीएसपी सुदिप पाठक र इन्स्पेक्टर भीष्म हुमागाईलाई पूर्वआइजीपीद्वय उपेन्द्रकान्त र प्रकाश अर्यालले दबाब दिएको स्रोत बताउँछ । रावल र गोरेबीच ६ पटकससम्म सम्पर्क भएको प्रमाण छानबिन समितिले फेला पारेको थियो ।
रावल र संजेल सँगै बसेर काम गरेका हुृन् ।

३३ किलो सुन प्रकरणमा सई गजेन्द्र रावलको अवैध रुपमा सुन भित्र्याउने चुडामणि उप्रेती ‘गोरे’ सँग ६ पटक कुराकानी भएको गृृह मन्त्रालयका सहसचिव इश्वर पौडेलको छानबिन समितिले समेत प्रमाण भेटिंदा पनि उनलाई बलियो प्रमाण नभेटिएको भन्दै शुक्रबार उन्मुक्ति दिइएपछि सुन तस्करीको जालो तोडिने अपेक्षा गरेकाहरुलाई निराश पारेको छ । रावललाई उन्मुक्ति दिने काम छानबिन समितिका सदस्य विशेष ब्यूरोका डीएसपी सुदिप पाठक र सीआइबीका इन्स्पेक्टर भीष्म हुमागाईले गरेका छन् । पूर्वआइजीपी उपेन्द्रकान्त अर्याल र प्रकाश अर्यालको डिजाइनमा पाठक र हुमागाईले रावललाई उन्मुक्ति दिएका छन् ।

छानबिन समितिका सदस्य हुमागाई र पण्डित उपेन्द्रकान्त र प्रकाश अर्यालका विश्वासपात्र हुन् । ३३ किलो सुन प्रकरणमा प्रकाश अर्यालकै निर्देशनमा अपराध महाशाखाका प्रमुख दिवेश लोहनीले बिराटनगरमा गएर सनम शाक्यलाई खोजी गर्न टोली परिचालन गरेका थिए । तत्कालीन महानगरीय आयुक्त कार्यालयका प्रमुख एआइजी जयबहादुर चन्दको अनुमति लिएर मात्र महाशाखाले टोली खटाउन सक्छ । तर आयुक्त चन्दसँग अनुमति नै नलिई सिधै प्रकाश अर्यालको निर्देशनमा सनम शाक्यको खोजी गर्न टोली पूर्वमा पठाइएको थियो ।

चुडामणि उप्रेती गोरेको प्रकाश अर्यालसँग कनेक्सन भएकाले ३३ किलो सुनमा अपराध महाशाखाको टोली खटाइएको थियो । २ बर्षअघि अन्तर्राष्ट्रिय विमानस्थलबाट अवैध रुपमा भित्रिएको सुनमा पूर्वडीआइजी गोविन्द निरौला, एसपी विकासराज खनालहरुलाई संगठित अपराधमा मुद्दा चलाउने निर्णय गरे पनि हालै २ महिनाअघि बरामद गरी छाडिएको ३३ किलो सुन काण्डमा अपराध अनुसन्धान महाशाखाका प्रमुख एसएसपी दिवेश लोहनीलाई जोगाउन खोजिएको छ ।

उपेन्द्रकान्त र प्रकाश अर्याल जस्ता ठूला माछालाई जोगाउनका लागि ३३ किलो सुनकाण्डमा मुछिएका अपराध महाशाखाका डीएसपी प्रजित केसीलाई मोरङ प्रहरीबाट पत्र काटिएको छ । छानबिन समितिले २ बर्षअघिको सुन प्रकरणमा संगठित अपराधमा मुद्दा चलाउन हिरासतमा पठाएको छ भने हालसालको ३३ किलो सुनमा मुछिएका प्रजित केसीलाई मोरङबाट पत्र काट्न लगाई उतैबाट मुद्दा चलाउने तयारी गरेका छन् ।

मोरङ प्रहरीबाट मुद्दा चलाउनु भनेकै यो मुद्दा फितलो बनाउन लागिएको प्रहरी स्रोत बताउँछ, मोरङको एसपीकोमा लगेर निष्पक्ष हुन्छ ? मोरङको एसपीले कसरी कारबाही गर्छन् ? यो सब जोगाउने खेल हो, प्रहरीका एक उच्च अधिकारीले भने–गोरेसँग कनेक्सन देखिएका सई रावल छुट्नु, प्रजित केसीको मुद्दा मोरङबाट चलाउनुले ३३ केजी सुन प्रकरण सामसुम पार्न लागिएको हो । स्रोतका अनुसार एसएसपी लोहनीमाथि मुद्दा नचलाउन माओवादीका नेता पूर्वगृहमन्त्री जनार्दन शर्मा र वर्तमान जलस्रोत मन्त्री बर्षमान पुनले चर्को दबाब दिइरहेका छन् । शर्माका नातेदारहरु एसएसपी लोहनीलाई जोगाउन तीव्र दौडधूपमा छन् ।

३३ किलो सुनका मुख्य दोषी एसएसपी लोहनी नै हुन्, उनले नै गोरेको इशारामा सनम शाक्यको हत्या भएको घटनास्थल नै परिवर्तन गरेको समाचार सार्वजनिक भइसकेको छ । यसरी २ बर्षअघि भएको सुन तस्करीमा पहुँच नभएका पूर्वडीआइजी र एसपीलाई संगठित अपराधमा मुद्दा चलाउने छानबिन समितिले ३३ केजी सुनप्रकरणमा दोषीलाई उन्मुक्ति दिन लागेको छ ।

सई बालकृष्ण संजेलबाट अर्का सई गजेन्द्र रावल, रावलबाट डीएसपी प्रजित केसी र केसीबाट एसएसपी दिवेश लोहनी र त्यसपछि प्रकाश अर्याल तानिने भएपछि छानबिन समितिका सदस्य पाठक र हुमागाईले ३३ किलो सुनका रावललाई छुटाकारा दिएका छन् भने केसीलाई मोरङ प्रहरीमा पठाएका छन् ।  नयाँपेज अनलाईनबाट