विहावर क्षेत्र पर्यटन महोत्सव हुँदै

 काभ्रेपलाञ्चोक जिल्लाको पनौती नगरपालिकास्थित कुशादेवी क्षेत्रमा पर्यटन महोत्सव हुने भएको छ । विहावर क्षेत्रको प्रचार गर्ने उद्देश्यले कुशादेवी क्षेत्र सरोकार समाजले महोत्सव आयोजना गर्न लागेको हो ।

यही वैशाख १५ गतेदेखि आयोजना गरिने तीनदिने महोत्सवबाट विहावर क्षेत्रको पर्यटनको विकासमा टेवा पुग्ने महोत्सव संयोजक क्याप्टेन रामेश्वर थापाले जानकारी दिनुभयो । प्राकृतिक रुपमा विहावर क्षेत्र निकै नै धनी भएको उहाँले बताउनुभयो ।

विहावरको फुल्चोकी क्षेत्र समुन्द्री सतहबाट दुई हजार ७०० किलोमिटरमा उचाइमा अवस्थित छ । उक्त क्षेत्रको फुल्चोकी डाँडाबाट सर्वाेच्च शिखर सगरमाथा, कञ्चनजंगा, गौरीशंखर, गणेश, माछापुच्छ«्रे लगायतका हिमशृंखलाको अवलोकन गर्न सकिन्छ । साथै त्यहाँ २८० प्रजातिका चराचुरुङ्गी का साथै विभिन्न प्रजातिका पुतली पाइन्छ । जैविक विविधताले भरपुर उक्त क्षेत्रमा चितुवा, बँदेल, मृग, सालक, दुम्सी, वनबिरालो, मलसाप्रो, चरिबाघ, काठेभालु लगायतका बन्यजन्तुसमेत पाइने गर्दछ ।

विहावर क्षेत्रको प्रमुख विशेषतामा यहाँ अर्गानिक तरकारी तथा दुग्धजन्य पदार्थ उत्पादन, जडीबुटीको प्रयोग, स्थानीय घरेलु उत्पादन प्रमुख छन् । विहावर क्षेत्र तापक्रमको हिसाबले पनि एकनासको छ । भौगोलिक क्षेत्र राम्रो भए पनि समुदाय निकै नै पिछडिएको अवस्थामा छ । यो वर्ष महोत्सवको शुरुआत भए पनि आगामी वर्ष पनि यसलाई निरन्तरता दिइने कुशादेवी सरोकार समाजका अध्यक्ष पुरुषोत्तम अधिकारीले बताउनुभयो । महोत्सवको नामबाट नै पछि संस्थाको गठन गरिने उहाँले जानकारी दिनुभयो ।

“विहावर नाम ऐतिहासिक भएका कारण पनि महोत्सवको नाम विहावर पर्यटन महोत्सव राखिएको हो,” कुशादेवी सरोकार समाजका अध्यक्ष पुरुषेत्तम सापकोटाले भन्नुभयो । विहावर क्षेत्रको पर्यटनको विकासका लागि सरकारको आँखा नपरेकाले उक्त क्षेत्रको पर्यटनको विकासका लागि महोत्सवको आयोजना गर्न लागिएको पनि उहाँले बताउनुभयो । पैसा कमाउनु मात्र महोत्सवको उद्देश्य नरहेको, उक्त क्षेत्रको प्रचार नै मुख्य रहेको आयोजक समितिले जनाएको छ ।

महोत्सवमा स्थानीय क्षेत्रमा उत्पादित खानालगायत उत्पादित कृृषि उपजलाई प्राथमिकता दिइनेछ । तीन दिनसम्म चल्ने महोत्सवमा दौड, प्याराग्लाइडिङ र साइक्लिङ मुख्य आकर्षण रहनेछन् साथै राष्ट्रिय तथा अन्तर्राष्ट्रिय स्तरका कलाकारलाई पनि सहभागी गराइनेछ । आज पत्रकार सम्मेलन गरी सरोकार समाजले महोत्सवबारे जानकारी दिएको थियो । (श्रव्य सामग्री उपलब्ध छ)