किर्ते काण्ड लागेका सांसद नवराज सिलवालले सर्वेन्द्र खनाललाई दिए यस्तो उपहार
पूर्वडीआईजी नवराज सिलवालले नेपाल प्रहरीका महानिरीक्षक सर्वेन्द्र खनाल र सशस्त्र प्रहरी बलका महानिरीक्षक शैलेन्द्र खनाललाई बधाई दिएका छन् । एमाले सांसद सिलवालले बिहीबार बिहान सामाजिक सञ्जालमार्फत दुवै आईजीलाई बधाई दिएका हुन् ।
सिलवाल तिनै हुन् जसले यसअघि आईजीपीमा नियुक्त जयबहादुर चन्दविरुद्ध सर्वोच्च अदालतमा मुद्दा हालेका थिए । उनले सरकारको निर्णय कार्यान्वयन नगर्न भन्दै दिएको निवेदनमा सुनुवाइ गर्दै सर्वोच्चले सरकारका नाममा अन्तरिम आदेश जारी गरेपछि चन्द आईजीपी बन्नबाट वञ्चित भएका थिए । त्यसपछि निमित्त प्रहरी आईजीमा डा. जगदीशचन्द्र पोखरेल नियुक्त भएका थिए । अदालतको मुद्दा किनारा लागेपछि मात्र अघिल्लो देउवा सरकारले प्रकाश अर्याललाई आईजी नियुक्त गरेको थियो ।
तर, आफूसँगैका डीआईजी अर्याल आईजीपी बनेकोमा सिलवालले उनलाई बधाई तथा शुभकामनासमेत दिएनन् । उनले पनि हालका डीआईजी रमेश खरेल जस्तै पदबाट राजीनामा दिएका थिए ।
डीआईजीबाट राजीनामा दिएर उनी एमाले प्रवेश गरी ललितपुर १ बाट प्रतिनिधिसभा सदस्यमा निर्वाचित पनि भए । तर, अहिलेसम्म डीआईजीको कार्यसम्पादन मूल्यांकनमा कीर्ते गरेको आरोपमा उनी खुलेर हिँड्न सकेका छैनन् । उनीविरुद्ध अदालतमा मुद्दा भए पनि सरकारले कारबाही फिर्ता गरेको छैन । उनीविरुद्धका सबै मुद्दा फिर्ता लिने तयारीमा सरकार लागेको बताइएको छ ।
