ओली भारतको काखा र आफुहरु पाखा परेको भन्दै राजेन्द्र महतोले आन्दोलन गर्ने भन्दै यस्तो घुर्की लगाए
प्रधानमन्त्री केपी शर्मा ओलीको भारत भ्रमण लगत्तै राष्ट्रिय जनता पार्टी (राजपा) नेपालका नेता राजेन्द्र महतोले आन्दोलनको चेतावनी दिएका छन्।
प्रधानमन्त्री ओलीको भारत भ्रमणले दुई देशबीचको सम्बन्ध सुधार गरेको बताउँदै महतोले भने , ‘प्रधानमन्त्री ओलीले भारत भ्रमणअघि नै संसदमा संविधान संशोधन गर्ने वाचा गरेका थिए। सोही सन्देश भारतलाई पनि गएको थियो। अब भारतबाट उहाँ फर्किनु भएको छ, संविधान संशोधनलाई अगाडि बढाउनु पर्छ।’
प्रधानमन्त्री ओलीले संविधान संशोधनको कुरालाई नेपाल मै स्वीकार गरेर गएकोले भारतमा ठूलो स्वागत भएको बताउँदै महतोले भने,‘त्यही भएर भारतमा संविधान संशोधन अथवा संविधानको स्वागतको कुरा उठेन। त्यहाँ दुई देशको सम्बन्ध विस्तारको कुरा उठ्यो। त्यो राम्रो हो। तर हाम्रो माग कहीँ कतै छुटेको छैन।’
आफूहरु निरन्तर आन्दोलनमा रहेकोले आन्दोलनबाट नभाग्ने बताउँदै महतोले भने,‘ओलीजीसँग सदनमा दुई तिहाई छ। संविधान संशोधन प्रक्रिया अगाडि बढाइएन भने हामी फेरि आन्दोलन मै जान्छौं। आन्दोलन बाहेकको विकल्प छैन।’
महतोले आफूहरुले आन्दोलनबाटै अधिकार प्राप्त गर्दै आएकोले संशोधनका लागि थप आन्दोलनको तयारी गरिने बताए।
संविधान संशोधन नभएसम्म आफूहरु सरकारमा सहभागी नहुने महतोले बताए।
‘ओलीजी भारत भ्रमणबाट आउनु भएको छ। भारत भ्रमणअघि गर्नुभएको प्रतिवद्धता पूरा गर्दै संविधान संशोधन गरे मात्र सरकारमा जाने सम्भावना बढ्नेछ। महतोले भने,‘होइन भने हामी हाम्रो भूमिकामा छँदैछौं।’
अहिले सरकारमा सहभागीका विषयमा कुनै चर्चा नभएको महतोले प्रष्ट पारे। सरकारले चाहेको खण्डमा सरकारमा सहभागिताको कुरा अगाडि बढ्न सक्ने महतोले बताए।
