दिवंगत कांग्रेस नेता खड्काको शव आज राति नेपाल ल्याइने, भोली यसरी गरिदैछ अन्त्यष्टि
उपचारको क्रममा शुक्रबार नयाँ दिल्लीमा निधन भएका कांग्रेस नेता खुमबहादुर खड्काको शव शनिबार राति साढे ९ बजे जेट एयरको विमानबाट नेपाल ल्याइने भएको छ ।
खड्काका छोरा अनुराग बेलायतमा रहेको र उनी नयाँ दिल्ली पुगेपछि मात्र शव नेपाल ल्याइने भएकाले शनिबार राति मात्र शव काठमाडौं ल्याइने भएको हो ।
शव काठमाडौं ल्याइएपछि शनिबार राति उनको निवासमा राखिनेछ । कांग्रेस पार्टी कार्यालयका अनुसार खड्का शव श्रद्धाञ्जलीका लागि आइतबार बिहान ८ बजेदेखि पार्टी कार्यालय सानेपामा राखिनेछ ।
सानेपाबाट शव यात्रासहित आइतबार बेलुका खड्काको शव पशुपति आर्यघाटनमा अन्त्यष्टि गरिने कांग्रेसले जनाएको छ । मिर्गौला रोगबाट पीडित खड्को शुक्रबार दिउँसो दिल्लीस्थित एपोलो अस्पतालमा निधन भएको थियो ।
फागुनको दोस्रो हप्ता उनलाई दिल्ली लगिएको थियो । खड्का निधनप्रति प्रधानमन्त्री केपी शर्मा ओली, कांग्रेस सभापति शेरबहादुर देउवाले दुःख व्यक्त गरेका छन् ।
यसैबिच केन्द्रीय सदस्यसमेत रहेका खड्काको निधन भएपछि कांग्रेसको जारी केन्द्रीय समिति बैठक स्थगित भएको छ ।
एक हप्तादेखि नियमति बिहान ११ बजेदेखि बेलुकासम्म चल्दै आएको बैठक स्थगित भएको पार्टी कार्यालयका सहयोगी केशव रिजालले जानकारी दिए ।
