सर्बेन्द्र खनाललाई प्रहरी प्रमुख बनाउन ओली र प्रचण्ड राजी,प्रचण्डले किन खनाल बोक्न ओलीलाई चुनौती दिए
केही हप्ताभित्रै प्रहरी महानिरिक्षक प्रकाश अर्यालले अवकाश पाउने भएपछि नयाँ आईजीपीको दौड सुरु भएको छ । आईजीपी कसलाई बनाउने भन्नेबारे आजमात्रै प्रधानमन्त्री केपी शर्मा ओली र सत्तारुढ दल नेकपा माओवादी केन्द्रका अध्यक्ष पुष्पकमल दाहाल प्रचण्डबीच छलफल भएको छ ।
प्रधानमन्त्रीको सरकारी निवास बालुवाटारमा भएको छलफलको सुरुवातमै प्रचण्डले वरियताको पहिलो नम्बरमा रहेका डिआईजी सर्वेन्द्र खनालको पक्षमा बोलेको स्रोतको दाबी छ । उनले कार्यसम्पादनको आधारमा डिआईजी पहिलो नम्बरमा भएकोले खनाललाई नै प्रहरी प्रमुखको जिम्मेवारी दिईनुपर्ने अडान राखेका थिए ।
अध्यक्ष प्रचण्डले आफ्नै पार्टीका नेता समेत रहेका गृहमन्त्री रामबहादुर थापा ‘बादल’ लाई पनि सोही अनुसार अघि बढ्न निर्देशन दिईसकेका छन् । प्रधानमन्त्री ओलीसँगको भेटलगत्तै अध्यक्ष प्रचण्डले गृहमन्त्री थापालाई फोन गरेरै खनालको पक्षमा दृढ रहन निर्देशन दिएको विशेष स्रोतको दाबी छ ।
हुन पनि गृहमन्त्री थापा अध्यक्ष प्रचण्डको चाहना अनुसार नै चल्ने पक्षमा देखिएका छन् । उनले आफू निकटका नेताहरुसँग पनि यो कुराको खुलासा गरिसकेका छन् । स्रोतका अनुसार प्रहरीको कमाण्ड गर्न तयारी अवस्थामा रहन डिआईजी खनाललाई आग्रह गरिसकेका छन् ।
तर, आईजीपी बन्ने दौडमा अरु डिआईजीहरु क्रमशः रमेश खरेल, पुष्कर कार्कीलगायत छन् । यिनीहरुमध्ये कार्कीले आफ्नो पक्षमा विशेष लविङ् गरेका छन् ।
प्रधानमन्त्री ओलीले राष्ट्रपति विद्यादेवी भण्डारीको दबाब थेग्न नसकेर कार्कीको पक्षमा निर्णय गर्न लागेको सूचना पाएपछि प्रचण्डले आज ओलीलाई भेटेर कडा चेतावनी दिएका हुन् ।
३० वर्षे सेवा हदका कारण आईजीपी अर्यालले चैत्र २८ गते सेवाबाट निवृत्त हुँदैछन् । प्रचण्ड र बादलको चाहनाअनुसार खनाल नै अग्र पंक्तिमा देखिन्छन् । यता खरेल पनि आइर्जीपी बन्ने दौडमा रहेका छन् उनले एमालेनिकट रहेर लबिङ गरिरहेको बुझिएको छ ।
