ओली र प्रचण्डको रोजार्इ गृहमा जनार्दन, अर्थमा सुरेन्द्र पाण्डे
एमालेभित्र अर्थमन्त्री र माओवादी केन्द्रभित्र गृहमन्त्रीको लफडाले सरकार बिस्तारमा कठिनाई भएको छ । दुई पार्टीले मन्त्रालयको बाँडफाडँ गर्दा अर्थ एमाले र गृह माओवादी केन्द्रले लिने सहमति भएको छ ।
एमालेभित्र अर्थमन्त्रीका लागि धेरै आकांक्षी भएपछि प्रधानमन्त्री एवं एमाले अध्यक्ष केपी शर्मा ओलीलाई अप्ठेरो परेका छन् । महासचिव इश्वर पोखरेल, उपमहासचिव विष्णु पौडेल, सचिव प्रदीप ज्ञवाली, स्थायी समिति सदस्य सुरेन्द्र पाण्डे अर्थमन्त्रीको दावेदार छन् । पार्टी एकतापछि पनि सहज हुने ब्यक्तिलाई अर्थमन्त्री बनाउन माओवादी केन्द्रका अध्यक्ष पुष्पकमल दाहाल प्रचण्डले ओलीलाई सुझाव दिएका छन् ।
ओलीको रोजाईमा सचिव प्रदीप ज्ञवाली परेका छन् । तर प्रचण्डले भने स्थायी समिति सदस्य सुरेन्द्र पाण्डेलाई अर्थमन्त्री बनाउन ओलीसँग आग्रह गरेको स्रोतले बताएको छ । सचिव ज्ञवाली पनि आफु अर्थमन्त्री नभए पाण्डेका पक्षमा वकालत गर्ने लगभग निश्चित भइसकेको छ ।
महासचिव इश्वर पोखरेलले अर्थमन्त्रीमा दावी गरेपछि अध्यक्ष ओलीलाई सकस परेको हो । एमालेले पाउने १० मन्त्रालय मध्ये सवैभन्दा बढि चासो अर्थमन्त्रालयमै देखाएका छन् । एमाले स्थायी कमिटीले मन्त्री छान्ने जिम्मा अध्यक्ष ओलीलाई दिएको छ । तर उनले कसलाई अर्थमन्त्री बनाउने भन्ने बिषयमा भने मुख खोलिसकेका छैनन् । स्थायी समिति बैठकमा अर्थमन्त्रीलाई लिएर विवाद भएको थियो ।
त्यसैगरी माओवादी केन्द्रभित्र पनि मन्त्रीका धेरै आकांक्षी देखिदा दाहाललाई समस्या भएको छ । गृहमन्त्रालयमा धेरै नेताहरु दावी गरेका छन् । नेता रामबहादुर थापा बादल, बर्षमान पुन, जनार्दन शर्मा, शक्ति बस्नेतले गृहमन्त्रीमै सशक्त दावी पेश गरेका छन् ।
दाहालले अर्थमन्त्रीमा सुझाव दिएजस्तै ओलीले पनि गृहमन्त्री आफुलाई सहज हुने ब्यक्ति पठाउन आग्रह गरेका छन् । ओलीले गृहमन्त्रीमा जनार्दन शर्मालाई पठाउन आग्रह गरेको दाहाल निकट स्रोतले बताएको छ । गृहमन्त्रीका लागि शर्मा ओलीको रोजाईमा परेका छन् ।
