पूर्वराजा ज्ञानेन्द्र शाह सोमबार भारत भ्रमणमा निस्कदै छन् । उनी ओडिसामा रहेको जगन्नाथपुरी दर्शनका लागि भारत जान लागेका हुन् ।
उनलाई त्यहाँका शंकराचार्यले विशेष अनुरोध गरी दर्शनका लागि मुख्य अतिथिका रुपमा राजी गराएका हुन् ।
पूर्वराजा यसअघि गत पुसको तेस्रो साता पनि भारत गएका थिए ।
कुन माध्यमबाट जाँदैछन् भारत ?
पूर्वराजा शाह उत्तरप्रदेशका मुख्य मन्त्री योगी आदित्यनाथको विशेष आग्रहमा पुसको तेस्रो साता लखनउ गएका थिए ।
त्यही बेला शंकराचार्यले निम्तो दिएका थिए । विशेष आग्रहपछि आदित्यनाथले पनि जोडबल गरेका थिए ।
त्यसकै कारण पूर्वराजा ओडिसा जान लागेका हुन् ।
के छ कार्यक्रम ?
पूर्वराजा सोमबार अपरान्ह ४ बजे त्रिभुवन अन्तर्राष्ट्रिय विमानस्थलबाट इन्डियन एयरलाइन्सको विमानबाट कोलकाता जानेछन् ।
सोमबार कोलकातामै रहने छन् ।
कोलकाताबाट मोटरमा मंगलबार तीन घण्टाको यात्रापछि जगन्नाथ पुग्नेछन् । त्यहाँ दर्शन गर्नेछन् ।
त्यसपछि पुनः कोलकाता फर्कने छन् । मंगलबार नै उनको राजनीतिक भेटघाट सुरु हुने बताइन्छ ।
एकहप्ता बसाइका क्रममा भारतीय प्रधानमन्त्री नरेन्द्र मोदीसंग पनि टेलिफोन वार्ता हुन सक्ने जनाइएको छ ।
के हो त मिसन ?
नेपालमा अब कम्युनिष्ट सरकार बन्दैछ । गणतन्त्रमा पनि राजसंस्था स्थायित्व रहने विभिन्न अन्तर्राष्ट्रिय उदाहरणसहितका आवाज आउन थालेपछि अहिले पूर्वराजाको सक्रियता बढेको हो ।
पूर्वराजालाई एमाले अध्यक्ष केपी ओलीले पनि आश्वस्त पारेको बताइन्छ । भूमिका कसरी दिने र कस्तो प्रकारको दिने भन्नेबारे छलफलमै रहे पनि पूर्वराजसंस्थालाई स्पेश दिन तयार भएको बताइन्छ ।
नेपाललाई हिन्दू राज्य बनाउनका लागि पनि भारतीय वर्तमान सरकार कस्सिएर लागेको बुझिएको छ ।
भारतीय सरकारले अहिले राजसंस्था व्युँताउन पनि अनेक किसिमका खेलहरु खेलिरहेको बुझिन्छ ।
संघीयताको सकस र यसले निम्त्याउने सकारात्मक भन्दा नकारात्मक सन्देश छर्दै राजसंस्थालाई ठाउँ दिन खोजिएको बताइन्छ । पूर्वराजाको यो भ्रमण कत्तिको फलदायी होला यसको छिनोफानो भोलिका दिनले गर्ने नै छन् ।
