प्रधानन्यायाधीश गोपाल पराजुलीको नागरिकता माग्दै किन सिडिओ कार्यालय पुगे गोबिन्द केसी?

प्रधानन्यायाधीश गोपाल पराजुलीको नागरिकताको प्रतिलिपी माग्दै डा गोविन्द केसीले काठमाडौं सिडियो कार्यालयमा निवेदन दर्ता गरेका छन् । बुधवार १० बजे बबरमहलस्थित सिडियो कार्यालयमा पुगेर निवेदन दर्ता गराएका हुन् ।

नागरिकलाई सूचना हक अन्तर्गत निवेदन दर्ता गरी नागरिकताको प्रतिलिपि मागिएको डा केसीले बताए । निवेदन दर्ता गराउन डा केसीसँगै अधिवक्ताहरु सुरेन्द्रराज भण्डारी र ओमप्रकाश अर्याल, कलाकार रवीन्द्रसिंह बानियाँ र डा अभिषेकराज सिंह त्यहाँ पुगेका छन्।

न्यायाधीश पराजुलीले नागरिकताको प्रतिलिपि लिँदा उमेर सच्याएको आरोप डा केसीले लगाएका छन् । न्यायपरिषदले कायम गरेको नागरिकताको विवरण र पराजुलीले पेश गरेको नागरिकताको प्रतिलिपिमा उल्लिखित जन्ममिति फरक रहेको विषयमा लामो समयदेखि विवाद छ।