सात प्रदेशमा सभामुखको बाजी मार्नेको यस्तो छ सुची,मुख्यमन्त्री हुने यी हुन् सात भाग्यमानी

नेकपा एमाले र माओवादी केन्द्रबीच मुख्यमन्त्री संगसंगै प्रदेशसभाको सभामुख र उपसभामुख पदको भागबण्डा मिलेको छ । दुई पार्टी सम्मिलित कार्यदलले आइतवार भागबण्डा टुंग्याएका हुन् ।
दुई दलबीच भएको सहमतिअनुसार प्रदेश नम्बर १, ३, ६ र ७ नम्बर प्रदेशको सभामुख एमालेले तथा प्रदेश नम्बर ४ र ५ को माओवादी केन्द्रले पाउने छन् । एउटा पार्टीको सभामुख भएको प्रदेशमा स्वतः अर्को दलको उपसभामुख हुनेछन् । सभामुख र उपसभामुख एउटै पार्टीको हुनु नहुने कानूनी व्यवस्था छ ।

प्रदेश नम्बर १ मा नेकपा एमालेका तर्फबाट शेरधन राई र भीम आचार्य मुख्यमन्त्रीका दाबेदार छन् । मुख्यमन्त्रीका दाबेदारमध्ये एकले सभामुख पाउने सम्भावना रहेको एमाले स्रोतले बतायो । जीवन घिमिरे, हिक्मत कार्की, राजेन्द्र राईले पनि मुख्यमन्त्रीको दाबी पेश गरेका छन् । एमालेले पाएका ४ मध्ये एकमा महिला सभामुख बनाउने अवस्थामा प्रदेश नम्बर १ मा उषाकला राईको सम्भावना छ । उनी पूर्वसभासद पनि हुन् ।

प्रदेश नम्बर ३ मा मुख्यमन्त्रीका लागि अष्टलक्ष्मी शाक्य र राजेन्द्र पाण्डेले आकांक्षा देखाएका छन् । दुवैको रणनीति मुख्यमन्त्रीमा छ, सभामुखमा चित्त बुझाउने सम्भावना कम देखिएको छ । एमाले स्रोतका अनुसार प्रदेश नम्बर ३ का जेष्ठ सदस्य डोरमणि पौडेल यो प्रदेशको सभामुख बन्ने सम्भावना छ । हेटौंडा नगरपालिकाका पूर्वमेयर समेत रहेका पौडेलले सांसदहरुलाई शपथ गराएका थिए ।

प्रदेश नम्बर ६ मा प्रकाश ज्वाला र यामलाल कंडेलमध्ये एकजना सभामुख बन्ने सम्भावना छ । दुवैजना मुख्यमन्त्रीका आंकाक्षी थिए । प्रदेश नम्बर ६ को मुख्यमन्त्री माओवादीले पाउने पक्का भएपछि सभामुख एमालेले पाउन लागेको हो । यो प्रदेशमा उपसभामुख माओवादीले पाउने छ । उपसभामुखमा सीता नेपालीको सम्भावना रहेको छ ।

प्रदेश ७ मा पठानसिंह बोहरा, प्रकाश शाह, तारा लामा तामाङ, झपट रावल लगायतको चर्चा छ । शाह वैकल्पिक केन्द्रय सदस्य हुन् । बोहराले कांग्रेस सभापति शेरबहादुर देउवाको निर्वाचन क्षेत्रबाट प्रदेशसभा सदस्यमा चुनाव जितेका थिए । मंगलबार बस्ने एमाले स्थायी समितिको बैठकले मुख्यमन्त्री र सभामुखको उम्मेदवार तय गर्नेछ ।

वामपन्थी गठबन्धनले प्रदेश नम्बर दुईको मुख्यमन्त्री र सभामुख दुवैमा मधेशकेन्द्रित दलहरुलाई छाड्ने संकेत गरेका छन् । प्रदेश २ मा संघीय समाजवादी फोरम ठूलो पार्टी भएकोले मुख्यमन्त्री उसले पाउने सम्भावना छ । फोरमले मुख्यमन्त्री पाएको खण्डमा सभामुख राजपाले पाउने छ । राजपाका तर्फबाट जितेन्द्र सोनल, मनिषकुमार सुमन वा डा डिम्पलकुमारी झाको सम्भावना छ । राजपा अध्यक्ष मण्डलका सदस्य अनिल झाकी पत्नी डिम्पल पूर्वसांसद् हुन् ।

प्रदेश नम्बर ४ र ५ मा सभामुख माओवादीले पाएको छ । यस विषयमा माओवादीले भोलि मात्र निर्णय गर्ने एक सांसदले जानकारी दिए । तर, पनि प्रदेश नम्बर ४ मा आशा कोइराला, रामजीप्रसाद बराल, विनोद केसीलगायतको नाम चर्चा छ । देउवा सरकारमा मन्त्री रहेकी कोइराला कांग्रेस युवा नेता प्रदीप पौडेललाई पराजित गर्दै तनहुँबाट प्रदेश सभामा निर्वाचित भएकी थिइन् ।

प्रदेश ५ मा कुलप्रसाद केसी सोनाम, सुदर्शन बराल, कृष्णध्वज खड्का र दामाकुमारी शर्मा लगायतको नाम चर्चामा छ । एमालेले सभामुख पाएको ठाउँमा माओवादीले उपसभामुख र माओवादीले सभामुख पाएको ठाउँमा एमालेले उपसभामुख पाउने छन् ।