राज्यलाई भार थप्दै देउवाले अर्को उपद्रो मच्चाए,गोप्य निर्णयका नाममा प्रहरीमा डिआइजीको चार दरबन्दी थप
सरकारले नेपाल प्रहरीको प्रहरी नायव महानिरीक्षक (डिआइजी)को दरबन्दी थप गरेको छ । बुधबार बसेको मन्त्रिपरिषद् बैठकले प्रहरीमा चार डिआइजीको दरबन्दी थप गरेको हो ।
दरबन्दी थपपछि प्रहरीमा डिआइजीको संख्या अब ३८ पुगेको छ । गृहमन्त्रालय स्रोतका अनुसार प्रधानमन्त्री शेरबहादुर देउवाको ठाडो प्रस्तावमा प्रहरीमा डिआइजीको दरबन्दी थप गर्ने निर्णय गरिएको हो ।
गृह स्रोतका अनुसार नेपाल प्रहरीको प्रधान कार्यालयबाट नौ डिआइजीको दरबन्दी थप गर्ने प्रस्ताव गरिएको थियो । त्यसमध्ये बुधबारको मन्त्रिपरिषद् बैठकले चारवटा मात्रै डिआइजीको दरबन्दी थप्ने निर्णय गरेको हो ।
बुधबारको मन्त्रिपरिषद्को बैठकले निर्णय गरेपनि सार्वजनिक भने गरिएको छैन । विवाद हुनसक्ने देखिएपछि निर्णय सार्वजनिक नगरिएको गृह स्रोतले जानकारी दियो ।
नेपाल प्रहरीमा अहिले प्रहरी महानिरीक्षक (आइजिपी) एक, प्रहरी अतिरिक्त महानिरीक्षक (एआइजी) १२, वरिष्ठ प्रहरी उपरीक्षक (एसएसपी) ७६, प्रहरी उपरीक्षक (एसपी) १ सय ५७, प्रहरी नायव उपरीक्षक (डिएसपी) ४ सय १८ र प्रहरी निरीक्षक १ हजार ३ सय ५४ छन् ।
