राष्ट्रियसभा निर्वाचनको लागि उमेदवार तय गर्न कांग्रेसका शीर्ष नेताको बैठक बस्दै
आशन्न राष्ट्रियसभा निर्वाचनका लागि उमेदवार टुंगो लगाउन सत्तारुढ नेपाली कांग्रेसले आज (मंगलबार) पनि आन्तरिक छलफल गर्ने भएको छ ।
उमेदवारको टुंगो लगाउन कांग्रेसले प्रधानमन्त्रीको सरकारी निवास बालुवाटारमा कांग्रेसका शीर्ष नेताहरुको बैठक बस्दैछ । राष्ट्रियसभा निर्वाचनका लागि उमेदवार टुंगो लगाउन बिहान ११ वजे बालुवाटारमा कांग्रेसका शीर्ष नेताहरुको बैठक बोलाइएको प्रधानमन्त्री शेरबहादुर देउवाका स्वकीय सचिव विरेन्द्र थापाले जानकारी दिए ।
यसअघि सोमबार बसेको बैठकले ७ नम्बर प्रदेशबाट राष्ट्रियसभाका चार जना उमेदवारहरुको टुंगो लगाएको थियो । कांग्रेसले ७ नम्बर प्रदेशबाट खुलातर्फ बद्रीप्रसाद पाण्डेय, महिलातर्फ तारादेवी भट्ट, दलिततर्फ शेरीराम पार्की र अपाङ्गता तर्फ छत्रराज जोशीलाई राष्ट्रियसभाका लागि उमेदवार बनाउने निर्णय गरेको हो ।
निर्वाचन आयोगले राष्ट्रियसभा निर्वाचनका लागि माघ १० गतेभित्रै उमेदवारी टुंगो लगाइसक्नु पर्ने कार्य तालिका निर्धारण गरेको छ ।
