नियम तोड्नेबाट एक करोड ६२ लाख सङ्कलन
गएको छ महिनामा नियम विपरीत सवारीसाधन चलाउने चालकलाई गरिएको कारबाहीबाट चितवन ट्राफिक प्रहरी कार्यालय रू. १ करोड ६२ लाख राजश्व सङ्कलन गरेको छ ।
साउनदेखि पुससम्ममा कारबाहीमा परेका २२ हजार सवारीसाधनका चालकबाट उक्त राजश्व रकम सङ्कलन भएको जिल्ला ट्राफिक प्रहरी कार्यालयका प्रमुख प्रहरी निरीक्षक सन्तोष पन्तले जानकारी दिए ।
पुसमा ३ हजार ५ सय सवारीसाधनका चालकलाई कारबाही गरी रू. २४ लाख ७८ हजार राजस्व सङ्कलन गरिएको छ । मापसे गरी सवारी चलाउने ४ सय ७ चालक कारबाहीमा परेका छन् ।
१३४ दुर्घटना, ६७ जनाको मृत्यु
ट्राफिक प्रहरीका अनुसार छ महिनामा १ सय ३४ वटा सवारीसाधन दुर्घटना भएका छन् । दुर्घटनामा परी ६७ जनाको मृत्यु भएको छ भने २ सय ५५ जना घाइते भएका छन् ।
छ महिनाको अन्तरालमा विभिन्न क्षेत्रमा ट्राफिक सङ्केत टाँस्ने तथा बोर्ड राख्ने काम गरिएको छ । सडक सुरक्षाको विषयमा विद्यार्थीलाई प्रशिक्षण तथा विभिन्न स्थानमा ट्राफिक सन्देशमूलक कार्यक्रम गरिएको छ । दैनिकजसो जिल्लामा ट्राफिक सचेतना कार्यक्रम गरिँदैआएको निरीक्षक पन्तले जानकारी दिए । उनका अनुसार चालकसँग एक मिनेट र यात्रुसँग दुई मिनेट कार्यक्रम सञ्चालन गरी दुई हजारभन्दा बढीलाई सचेत गरिएको छ ।
