राष्ट्रपति विद्यादेवी भण्डारीले माओवादी केन्द्रका अध्यक्ष पुष्पकमल दाहाल प्रचण्डको परिवारलाई ‘डिनर’ दिएकी छन् ।
राष्ट्रपतिले प्रचण्ड परिवारको सम्मानमा शुक्रबार राति शीतल निवासमा डिनर दिएकी हुन् । राष्ट्रपति भण्डारीले पुनः राष्ट्रपतिमा दोहोरिन गरिरहेको चलखेलका बीच बाम गठबन्धनका दुई मध्ये एक प्रमुख नेताको परिवारलाई डिनर दिनुलाई अर्थपूर्ण रुपमा हेरिएको छ । राष्ट्रपतिको डिनरमा प्रचण्डसहित पत्नि सीता, छोरीहरु रेणु र गंगा तथा ज्वाईंहरु सागर केसी, अर्जुन पाठक जिवन आचार्य सहभागी थिए । यस्तै प्रचण्डका एक मात्र छोरा स्वर्गीय प्रकाश दाहालका सिर्जना त्रिपाठी तर्फका छोरा प्रसिद्ध र बिना मगरतर्फका प्रणब पनि डिनरमा देखिए ।
कान्छी बुहारी बिना डिनरमा थिइन् भने सिर्जनालाई प्रचण्ड परिवारले लगेन । भरतपुर महानगरपालिकाकी मेयरसमेत रहेकी रेणु दाहालले आफूहरु र राष्ट्रपतिको परिवारबीच पारिवारिक जमघट भएको बताइन् । ‘यो पारिवारिक जमघट हो’, उनले भनिन्, ‘राष्ट्रपतिज्यूले डिनरका लागि बोलाउनुभएको थियो ।’
