आफुलाई पृथ्वीनारायणसँग तुलना गर्दै प्रचण्डले भने-शान्ति सम्झौताका दुई खम्मा मध्ये अहिले म मात्रै छु,अबको प्रधानमन्त्री मै हो

माओवादी केन्द्रका अध्यक्ष पुष्पकमल दाहालले आफु अबको नेतृत्व आफ्नै काँधमा आएको बताएका छन् ।
देशभक्त गणतान्त्रिक मञ्चले काठमाडौंमा गरेको कार्यक्रममा अध्यक्ष दाहालले क्रान्ति, शान्ति, संविधान निर्माणको आफु एक मात्रै हस्ती भएको भन्दै अब संविधान कार्यान्वयन र समृद्धिको नेतृत्व पनि आफैले गर्नु पर्ने आवश्यकता रहेको बताएका हुन् ।

उनले घुमाउरो भाषा आफु प्रधानमन्त्री बन्नु पर्ने बताएका हुन् । उनले भनेका छन्, ‘क्रान्तिको नेतृत्व मैले गरे, शान्ति सम्झौताका दुई खम्मा मध्य अहिले म मात्रै छु । संविधान निर्माणताका उच्चस्तरीय राजनीतिक संयन्त्रको नेतृत्व गरेर संविधान जारी गर्न महत्वपूर्ण भूमिका खेले । अब संविधान कार्यान्वयनमा नेतृत्व गर्ने जिम्मा पनि मेरै काँधमा आएको छ ।

एकै व्यक्तिलाई यति धेरै अवसर निकै कमलाई मात्रै प्राप्त हुन्छ, उनले अगाडि भने, ‘मलाई त्यस्तो अवसर प्राप्त भयो, नेपाल राष्ट्र र नेपाली जनताप्रति म ऋणि छु ।’

उनले आफुलाई पृथ्वीनारायण शाहपछि नेपालमा सबैभन्दा ठूलो आन्दोलन गर्ने व्यक्तिको रुपमा चित्रित गरेका छन् । उनले भने, ‘पृथ्वीनारायण शाहपछि नेपालमा सबैभन्दा ठूलो आन्दोलन र बलिदान मेरै नेतृत्वमा प्राप्त भयो, त्यसले गणतन्त्र, संघीयता र नयाँ संविधान दियो ।’

मेरै नेतृत्वमा शान्ति सम्झौता भयो, उनले थपे, ‘युद्ध र शान्ति दुवैको नेतृत्व गर्ने अवसर जनताले मलाई दिए । संविधान निर्माण र कार्यान्वयनमा पनि मैले नेतृत्वदायी भूमिका खेले । अब नेपालको स्थिरता, विकास र समृद्धिको नेतृत्व पनि मेरै काँधमा आएको छ, त्यो जिम्मेवारी पनि म पूरा गर्छु ।’

उनले निर्वाचनमार्फत् जनताले दिएको जनमतप्रति पार्टी र नेताहरु विनम्र हुनुपर्ने पनि बताए । उनले भने, “जनताले हामीलाई निकै ठूलो जिम्मेवारीको भारी बोकाएका छन्। हाम्रो दायित्व देशमा स्थिरता र विकासको सपना साकार पार्नु हो । जनमतबाट हामी अझै जिम्मेवार बन्नुपर्छ, विनम्र बन्नुपर्छ । जनमतको सम्मान गरेर अघि बढ्नुपर्छ ।”

“हामीले बामपन्थी गठबन्धन बनाएर निर्वाचन लड्यौं । जनताले बाम समीकरण र पार्टी एकतालाई अनुमोदन गरेका छन्’ अध्यक्ष दाहालले भने, ‘अब हामी इमान्दार भएर अगाडि बढ्नुपर्छ । निर्वाचनले धेरै चुनौतिको समाधान दिएको छ । तर, केही चुनौति देखिएका छन् । संविधान र कानूनको फरक व्याख्या देखिएको छ । यसको समाधान पनि जनमतअनुसार नै हुन्छ । राष्ट्रिय एकता र भौगोलिक अखण्डताको प्रावधान बाहेक अरु कुरा जनमतका आधारमा परिमार्जन गर्न सकिन्छ ।’ उनले अब काँग्रेस लगायत सबै राष्ट्रिय पार्टीहरुसँग मिलेर जानुपर्ने आवश्यकता औँल्याए ।